ADVERTISEMENT
ADVERTISEMENT
અમેરિકન ભારતીય કલાકારોએ મમદાનીની સ્મોલ બિઝનેસ વર્લ્ડ કપ ઝુંબેશને આપ્યો ટેકો
28 મેના રોજ ન્યૂયોર્કમાં ત્રીજી વાર્ષિક સ્મોલ બિઝનેસ મંથ એક્સ્પોનું પણ આયોજન થયું
-
જેફીન કલિકાલ - Mon, 01, Jun 2026
- 08:37 EDT
- 9
(ડાબેથી) સાગર શેખ, આસિફ અલી, જોહરાન મમદાની અને પૂર્ણા જગન્નાથન / Zohran Mamdani via X
ન્યૂયોર્ક સિટીના મેયર ઝોહરાન મમદાનીના વહીવટીતંત્રના સંદેશને શહેરના 1.80 લાખ નાના ઉદ્યોગસાહસિકો સુધી પહોંચાડવા માટે ભારતીય મૂળની અભિનેત્રી પૂર્ણા જગન્નાથન, ભારતીય મૂળના અભિનેતા આસિફ અલી અને પાકિસ્તાની મૂળના અભિનેતા સાગર શેખ એક નવા વિડિયોમાં જોડાયા હતા. આ વિડિયો સ્મોલ બિઝનેસ મંથના સમાપન પ્રસંગે રજૂ કરવામાં આવ્યો હતો.
અમેરિકામાં મે મહિનો સ્મોલ બિઝનેસ મંથ તરીકે ઉજવવામાં આવે છે. મહિના અંતે મેયર મમદાનીએ ન્યૂયોર્ક સિટી કાઉન્સિલની સ્મોલ બિઝનેસ કમિટીના અધ્યક્ષ શાનેલ થોમસ-હેનરી સાથે મળીને શહેરના નાના વેપારીઓ માટે ભવિષ્યની યોજનાઓ અને અત્યાર સુધીની સિદ્ધિઓ પર પ્રકાશ પાડ્યો.
વિડિયોમાં ત્રણેય કલાકારોએ હળવા અને રમૂજી અંદાજમાં મમદાનીના સંદેશને સરળ ભાષામાં લોકો સુધી પહોંચાડ્યો.
સ્મોલ બિઝનેસ મંથ અંતર્ગત મમદાની અને સ્મોલ બિઝનેસ સર્વિસિસ (SBS) વિભાગે 2026ની FIFA વર્લ્ડ કપ માટે સ્થાનિક વેપારીઓને તૈયાર કરવા શહેરવ્યાપી જાગૃતિ અભિયાનની જાહેરાત કરી.
મમદાનીએ જણાવ્યું કે, "વર્લ્ડ કપ દરમિયાન તમારા વ્યવસાયને વધતા ગ્રાહકો અને પ્રવાસીઓ માટે તૈયાર કરવા અમે જરૂરી સહાય પૂરી પાડી રહ્યા છીએ."
તેમણે ઉમેર્યું, "મોટી સંખ્યામાં પ્રવાસીઓ શહેરમાં આવશે, તેથી સ્થાનિક વેપારીઓ માટે આ આવક વધારવાની મોટી તક છે. સ્મોલ બિઝનેસ મંથ પૂર્ણ થઈ રહ્યો છે, પરંતુ અમે આખું વર્ષ નાના વેપારીઓને સહયોગ આપતા રહીશું."
આ પહેલ હેઠળ ‘NYC વર્લ્ડ કપ 2026 બિઝનેસ ટૂલકિટ’ને પણ પ્રોત્સાહન આપવામાં આવી રહ્યું છે, જે વેપારીઓને વધતા પ્રવાસન અને ગ્રાહક પ્રવાહ માટે તૈયાર થવામાં મદદ કરશે.
મમદાનીએ જણાવ્યું કે, "સ્થાનિક ઉદ્યોગસાહસિકોને એવી શહેર સરકાર મળવી જોઈએ જે ખરેખર તેમની મદદ કરે."
તેમણે કહ્યું કે, "અમારા પ્રથમ 100 દિવસમાં અમે નાના વેપારીઓને દંડ અને ફીમાંથી લગભગ 60 લાખ ડોલરની બચત કરાવી છે. ઉપરાંત, નાના વેપારીઓની મુશ્કેલીઓ સમજતા કમિશનરની નિમણૂક કરી છે અને સૌથી નાના વેપારીઓને મદદરૂપ થવા માટે પ્રથમ વખત ‘મોમ-એન્ડ-પોપ જાર’ જેવી પહેલ શરૂ કરી છે."
મમદાનીએ વધુમાં જણાવ્યું કે તેમની સરકાર ‘બિઝનેસ એક્સપ્રેસ સર્વિસ ટીમ’નો વિસ્તાર કરી રહી છે, જેથી તપાસ, નિરીક્ષણ અને અન્ય સરકારી પ્રક્રિયાઓમાં વેપારીઓને વ્યક્તિગત માર્ગદર્શન મળી શકે.
તેમણે ઉમેર્યું કે, "વાણિજ્યિક ભાડા સંબંધિત વિવાદોમાં નાના વેપારીઓને મદદરૂપ થવા માટે મફત કાનૂની સેવાઓનો પણ વિસ્તાર કરવામાં આવી રહ્યો છે."
મમદાની પોતાના ચૂંટણી પ્રચારની શરૂઆતથી જ નાના વેપારીઓના સમર્થક રહ્યા છે. મેયર તરીકે પદભાર સંભાળ્યા બાદ તેમણે નિયમન પ્રક્રિયાઓ સરળ બનાવવી, દંડ અને ફી ઘટાડવી, નાણાકીય સહાય સુધી પહોંચ વધારવી અને NYC Business Express Service Team (NYC BEST) મારફતે નાના વેપારીઓને 60 લાખ ડોલરથી વધુની બચત કરાવવામાં મદદ કરી છે.
આ દરમિયાન 28 મેના રોજ યોજાયેલા ત્રીજા વાર્ષિક NYC સ્મોલ બિઝનેસ મંથ એક્સ્પોમાં નાના વેપારીઓને શહેરની વિવિધ એજન્સીઓ, ઉદ્યોગ નિષ્ણાતો અને સંસાધન પ્રદાતાઓ સાથે સીધા જોડાવાની તક મળી હતી.
ગુજરાતીમાં અન્ય સમાચારો વાંચવા અહીં ક્લિક કરો "ન્યુ ઇન્ડિયા અબ્રોડ ગુજરાતી"
Related
ADVERTISEMENT
ADVERTISEMENT
E Paper
Video
Comments
Start the conversation
Become a member of New India Abroad to start commenting.
Sign Up Now
Already have an account? Login