ADVERTISEMENT
ADVERTISEMENT
ਸਾਂਝਾ ਸਮਾਗਮ ਰੱਦ ਹੋਣ ਮਗਰੋਂ ਕੈਨੇਡਾ ਨੇ ਇਕੱਲੇ ਕੀਤਾ ਅਮਰੀਕਾ ਸਰਹੱਦੀ ਪੁਲ ਦਾ ਉਦਘਾਟਨ
ਟਰੰਪ ਨੇ ਸੋਸ਼ਲ ਮੀਡੀਆ ਪੋਸਟ ਰਾਹੀਂ ਦਿੱਤੀ ਪ੍ਰਤੀਕਿਰਿਆ
-
ਏਐੱਫਪੀ - Sat, 25, Jul 2026
- 04:01 EDT
- 17
ਗੋਰਡੀ ਹਾਓ ਇੰਟਰਨੈਸ਼ਨਲ ਬ੍ਰਿਜ਼ / Wikipedia
ਅਮਰੀਕਾ ਵੱਲੋਂ ਇਸ ਹਫ਼ਤੇ ਕੈਨੇਡਾ ਦੇ ਕਈ ਉਤਪਾਦਾਂ 'ਤੇ ਨਵੇਂ ਟੈਰਿਫ਼ ਲਗਾਉਣ ਦੇ ਐਲਾਨ ਤੋਂ ਬਾਅਦ ਸਾਂਝਾ ਉਦਘਾਟਨ ਸਮਾਗਮ ਰੱਦ ਕਰ ਦਿੱਤਾ ਗਿਆ, ਜਿਸ ਤੋਂ ਬਾਅਦ ਕੈਨੇਡਾ ਨੇ 24 ਜੁਲਾਈ ਨੂੰ ਅਮਰੀਕਾ ਨਾਲ ਲੱਗਦੇ ਸਰਹੱਦੀ ਪੁਲ ਦਾ ਇਕੱਲੇ ਹੀ ਸ਼ਾਂਤ ਢੰਗ ਨਾਲ ਉਦਘਾਟਨ ਕਰ ਦਿੱਤਾ।
ਪੁਲ ਦੇ ਕੈਨੇਡੀਅਨ ਪਾਸੇ ਹੋਏ ਸਮਾਗਮ ਦੌਰਾਨ ਕੈਨੇਡਾ ਦੇ ਹਾਊਸਿੰਗ ਅਤੇ ਬੁਨਿਆਦੀ ਢਾਂਚਾ ਮੰਤਰੀ ਗ੍ਰੇਗਰ ਰਾਬਰਟਸਨ ਨੇ ਕਿਹਾ, "ਇਹ ਪੁਲ ਇਸ ਗੱਲ ਦਾ ਸਬੂਤ ਹੈ ਕਿ ਜਦੋਂ ਅਸੀਂ ਮਿਲ ਕੇ ਕੰਮ ਕਰਦੇ ਹਾਂ ਤਾਂ ਕੀ ਕੁਝ ਬਣਾ ਸਕਦੇ ਹਾਂ।"
ਓਨਟਾਰੀਓ ਦੇ ਪ੍ਰੀਮੀਅਰ ਡੱਗ ਫੋਰਡ ਨੇ ਅਮਰੀਕਾ-ਕੈਨੇਡਾ ਸਬੰਧਾਂ ਬਾਰੇ ਕਿਹਾ, "ਪਿਛਲੇ ਕੁਝ ਸਾਲਾਂ ਦੌਰਾਨ ਸਾਡੇ ਸਬੰਧਾਂ ਨੂੰ ਚੁਣੌਤੀਆਂ ਦਾ ਸਾਹਮਣਾ ਕਰਨਾ ਪਿਆ ਹੈ," ਪਰ ਨਾਲ ਹੀ ਉਨ੍ਹਾਂ ਕਿਹਾ, "ਆਓ ਮਿਲ ਕੇ ਕੰਮ ਕਰਨਾ ਜਾਰੀ ਰੱਖੀਏ।"
ਦੂਜੇ ਪਾਸੇ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਇਸ ਮੌਕੇ 'ਤੇ ਸੋਸ਼ਲ ਮੀਡੀਆ 'ਤੇ ਤਿੱਖੇ ਲਹਿਜ਼ੇ ਵਿੱਚ ਪ੍ਰਤੀਕਿਰਿਆ ਦਿੱਤੀ। ਟਰੰਪ ਨੇ ਆਪਣੇ ਸੋਸ਼ਲ ਮੀਡੀਆ ਪਲੇਟਫਾਰਮ ਟਰੂਥ ਸੋਸ਼ਲ 'ਤੇ ਲਿਖਿਆ, "ਕੈਨੇਡਾ ਨੇ ਗੋਰਡੀ ਹਾਓ ਪੁਲ ਦੇ ਉਦਘਾਟਨ ਸਮਾਗਮ ਤੋਂ ਸੰਯੁਕਤ ਰਾਜ ਅਮਰੀਕਾ ਨੂੰ ਬਾਹਰ ਕਰ ਦਿੱਤਾ, ਜੋ ਠੀਕ ਹੈ, ਕਿਉਂਕਿ ਉਹ ਅਮਰੀਕਾ ਨੂੰ ਭਾਰੀ ਟੈਰਿਫ਼ ਅਦਾ ਕਰ ਰਹੇ ਹਨ।" ਉਨ੍ਹਾਂ ਅੱਗੇ ਕਿਹਾ, "ਅਸੀਂ ਸਮਝੌਤੇ ਦੀਆਂ ਸ਼ਰਤਾਂ ਬਦਲ ਦਿੱਤੀਆਂ ਹਨ, ਜਿਸ ਤੋਂ ਬਾਅਦ ਹੁਣ ਸੰਯੁਕਤ ਰਾਜ ਅਮਰੀਕਾ ਨੂੰ ਮੁਨਾਫ਼ੇ ਦਾ 50 ਫ਼ੀਸਦੀ ਹਿੱਸਾ ਮਿਲੇਗਾ।"
2.5 ਕਿਲੋਮੀਟਰ (1.5 ਮੀਲ) ਲੰਬਾ ਇਹ ਪੁਲ ਅਮਰੀਕਾ ਦੇ ਡਿਟਰਾਇਟ ਸ਼ਹਿਰ ਨੂੰ ਕੈਨੇਡਾ ਦੇ ਵਿੰਡਸਰ ਸ਼ਹਿਰ ਨਾਲ ਜੋੜਦਾ ਹੈ। ਇਸ ਦਾ ਨਾਮ ਕੈਨੇਡਾ ਵਿੱਚ ਜਨਮੇ ਪ੍ਰਸਿੱਧ ਆਈਸ ਹਾਕੀ ਖਿਡਾਰੀ ਗੋਰਡੀ ਹਾਓ ਦੇ ਨਾਮ 'ਤੇ ਰੱਖਿਆ ਗਿਆ ਹੈ, ਜਿਨ੍ਹਾਂ ਨੇ ਅਮਰੀਕੀ ਟੀਮਾਂ ਲਈ ਖੇਡਿਆ ਸੀ। ਸਾਲ 2018 ਵਿੱਚ ਸ਼ੁਰੂ ਹੋਏ ਇਸ ਪੁਲ ਦੇ ਨਿਰਮਾਣ 'ਤੇ 6.4 ਅਰਬ ਕੈਨੇਡੀਅਨ ਡਾਲਰ (4.5 ਅਰਬ ਅਮਰੀਕੀ ਡਾਲਰ) ਦੀ ਲਾਗਤ ਆਈ, ਜਿਸ ਦਾ ਪੂਰਾ ਖ਼ਰਚਾ ਕੈਨੇਡਾ ਨੇ ਉਠਾਇਆ।
ਸੋਮਵਾਰ ਨੂੰ ਟਰੰਪ ਨੇ ਕੈਨੇਡਾ ਦੇ ਕਈ ਉਤਪਾਦਾਂ 'ਤੇ 50 ਫ਼ੀਸਦੀ ਡਿਊਟੀ ਲਗਾਉਣ ਦੇ ਹੁਕਮ ਦਿੱਤੇ, ਜੋ 30 ਦਿਨਾਂ ਵਿੱਚ ਲਾਗੂ ਹੋਣਗੇ।
ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਕਿਹਾ ਕਿ ਨਵੇਂ ਟੈਰਿਫ਼ਾਂ ਦੇ ਜਵਾਬ ਵਿੱਚ ਉਹ "ਸਾਰੇ ਵਿਕਲਪਾਂ" 'ਤੇ ਵਿਚਾਰ ਕਰ ਰਹੇ ਹਨ ਅਤੇ ਉਨ੍ਹਾਂ ਅਤੇ ਟਰੰਪ ਵਿਚਾਲੇ ਆਉਣ ਵਾਲੇ ਹਫ਼ਤਿਆਂ ਵਿੱਚ ਗੱਲਬਾਤ ਨੂੰ "ਹੋਰ ਤੇਜ਼ ਕਰਨ" 'ਤੇ ਸਹਿਮਤੀ ਬਣੀ ਹੈ। ਇਸ ਤੋਂ ਬਾਅਦ ਮੰਗਲਵਾਰ ਨੂੰ ਪੁਲ ਦੇ ਵਿੱਤੀ ਪ੍ਰਬੰਧਨ ਨਾਲ ਸਬੰਧਤ ਇੱਕ ਪ੍ਰਸਤਾਵਿਤ ਸਮਝੌਤਾ ਸਾਹਮਣੇ ਆਉਣ ਮਗਰੋਂ ਕਾਰਨੀ ਨੂੰ ਤਿੱਖੀ ਆਲੋਚਨਾ ਦਾ ਸਾਹਮਣਾ ਕਰਨਾ ਪਿਆ। ਆਲੋਚਕਾਂ ਨੇ ਇਸ ਨੂੰ ਅਮਰੀਕੀ ਪੱਖ ਦੇ ਹੱਕ ਵਿੱਚ ਕਾਫ਼ੀ ਅਨੁਕੂਲ ਕਰਾਰ ਦਿੱਤਾ। ਸਮਝੌਤੇ ਦੀਆਂ ਸ਼ਰਤਾਂ ਅਨੁਸਾਰ ਕੈਨੇਡਾ 15 ਸਾਲਾਂ ਤੱਕ ਪੁਲ ਤੋਂ ਹੋਣ ਵਾਲੀ ਕੁੱਲ ਸ਼ੁੱਧ ਆਮਦਨ ਦੇ 50 ਫ਼ੀਸਦੀ ਦੇ ਬਰਾਬਰ ਰਕਮ ਅਮਰੀਕੀ ਆਰਥਿਕ ਵਿਕਾਸ ਫੰਡ ਵਿੱਚ ਜਮ੍ਹਾਂ ਕਰਵਾਏਗਾ।
ਹਾਲਾਂਕਿ ਵੀਰਵਾਰ ਨੂੰ ਕਾਰਨੀ ਨੇ ਸਪੱਸ਼ਟ ਕੀਤਾ ਕਿ ਆਮਦਨ ਦੀ ਸਾਂਝ ਸਿਰਫ਼ ਉਸ ਰਕਮ 'ਤੇ ਲਾਗੂ ਹੋਵੇਗੀ, ਜੋ ਪੁਲ ਦੇ ਨਿਰਮਾਣ ਲਈ ਲਏ ਗਏ ਕਰਜ਼ੇ ਦੀਆਂ ਨਿਯਮਤ ਅਦਾਇਗੀਆਂ ਕਰਨ ਤੋਂ ਬਾਅਦ ਬਚੇਗੀ। ਉਨ੍ਹਾਂ ਕਿਹਾ ਕਿ ਇਹ ਪ੍ਰਬੰਧ 2012 ਦੇ ਉਸ ਸਮਝੌਤੇ ਅਧੀਨ ਹੈ, ਜੋ "ਅਜੇ ਵੀ ਲਾਗੂ ਹੈ।"
ਫ਼ਰਵਰੀ ਵਿੱਚ ਟਰੰਪ ਨੇ ਇਸ ਪੁਲ ਨੂੰ ਪੂਰੀ ਤਰ੍ਹਾਂ ਰੋਕਣ ਦੀ ਧਮਕੀ ਦਿੱਤੀ ਸੀ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਇਸ ਦੇ ਨਿਰਮਾਣ ਵਿੱਚ ਸੰਯੁਕਤ ਰਾਜ ਅਮਰੀਕਾ ਨਾਲ ਨਾਇਨਸਾਫ਼ੀ ਹੋਈ ਹੈ ਅਤੇ ਇਸ ਦੀ ਮਾਲਕੀ "ਘੱਟੋ-ਘੱਟ ਅੱਧੀ ਅਮਰੀਕਾ ਦੀ ਹੋਣੀ ਚਾਹੀਦੀ ਹੈ।"
Leave A Comment
Related
ADVERTISEMENT
ADVERTISEMENT
E Paper
Video
Comments
Start the conversation
Become a member of New India Abroad to start commenting.
Sign Up Now
Already have an account? Login