ADVERTISEMENT
ADVERTISEMENT
વડાપ્રધાન મોદીના ગુજરાત પ્રવાસના બે દિવસ પહેલાં કચ્છમાંથી ઝડપાયો પાકિસ્તાની જાસૂસ.
માહિતીના બદલામાં ગોહિલને અજાણ્યા વ્યક્તિ દ્વારા 40,000 રૂપિયા રોકડા આપવામાં આવ્યા હતા.
-
કુશલ પંડયા - Sat, 24, May 2025
- 05:41 EDT
- 22
.jpg)
ગુજરાત ATS દ્વારા ધરપકડ કરાયેલ પાકિસ્તાની જાસૂસ સહદેવસિંહ ગોહિલ.(મધ્યમાં) / Gujarat ATS
વડાપ્રધાન નરેન્દ્ર મોદીના ગુજરાત પ્રવાસના બે દિવસ પહેલાં, ગુજરાત એન્ટી ટેરરિઝમ સ્ક્વોડ (ATS) એ કચ્છ જિલ્લાના માતા-ના-મઢ ગામમાં રહેતા 28 વર્ષના સહદેવસિંહ દીપુભા ગોહિલની ધરપકડ કરી છે. તેમના પર આરોપ છે કે તેઓ પાકિસ્તાની ગુપ્તચર અધિકારી માટે જાસૂસી કરી રહ્યા હતા અને ભારતની સુરક્ષા સાથે સંકળાયેલી સંવેદનશીલ માહિતી શેર કરી હતી. આ ઘટના એવા સમયે બની છે જ્યારે વડાપ્રધાન મોદી ગુજરાતના પ્રવાસે આવી રહ્યા છે, જેના કારણે સુરક્ષા એજન્સીઓની સતર્કતા વધી ગઈ છે.
સહદેવસિંહ ગોહિલ માતા-ના-મઢ પ્રાથમિક આરોગ્ય કેન્દ્રમાં મલ્ટી પર્પઝ હેલ્થ વર્કર તરીકે કામ કરતા હતા. ATSના જણાવ્યા અનુસાર, ગુજરાત પોલીસના એક PSI ને આ બાબતે માહિતી મળી હતી અને જેની ઊંડાણપૂર્વક તપાસ કરવામાં આવતા વિગતો બહાર આવી હતી. જેમાં ગોહિલ 2023ના મધ્યમાં વોટ્સએપ દ્વારા “આદિતી ભારદ્વાજ” નામની એક મહિલાના સંપર્કમાં આવ્યા હતા, જે પાકિસ્તાની ગુપ્તચર સેવાની એજન્ટ હોવાનું માનવામાં આવે છે. આદિતીના કહેવા પર ગોહિલે બોર્ડર સિક્યોરિટી ફોર્સ (BSF) અને ભારતીય નૌકાદળની ગોપનીય માહિતી, જેમાં ફોટા અને વિડિયોનો સમાવેશ થાય છે, મોકલ્યા હતા. 2025ની શરૂઆતમાં ગોહિલે તેમના આધાર કાર્ડનો ઉપયોગ કરીને નવું સિમ કાર્ડ ખરીદ્યું હતું અને તેના પર વોટ્સએપ એક્ટિવેટ કરીને આદિતીને આપ્યું હતું. આ નંબર દ્વારા તેમણે સંવેદનશીલ માહિતી શેર કરી હતી.
આ માહિતીના બદલામાં ગોહિલને અજાણ્યા વ્યક્તિ દ્વારા 40,000 રૂપિયા રોકડા આપવામાં આવ્યા હતા. ATSએ તકનીકી નિરીક્ષણ અને માનવીય ગુપ્તચર માહિતીના આધારે આ કેસનો પર્દાફાશ કર્યો અને ગોહિલની ધરપકડ કરી. તેમનો મોબાઈલ ફોન ફોરેન્સિક લેબોરેટરીમાં મોકલવામાં આવ્યો છે, જ્યાં ડિલીટ કરેલી માહિતી પુનઃપ્રાપ્ત કરવાનો પ્રયાસ ચાલી રહ્યો છે. ગોહિલ અને આદિતી ભારદ્વાજ વિરુદ્ધ ભારતીય ન્યાય સંહિતાની કલમ 61 અને 148 હેઠળ કેસ નોંધાયો છે.
ગુજરાતના ગૃહરાજ્ય મંત્રી હર્ષ સંઘવી / X@@sanghaviharshગુજરાતના ગૃહ રાજ્ય મંત્રી હર્ષ સંઘવીએ આ ઘટના અંગે જણાવ્યું, “ગુજરાત પોલીસ અને ATS રાજ્યની સુરક્ષા માટે સતત સતર્ક છે. આવા કેસોમાં કોઈપણ પ્રકારની ઢીલાશ નહીં રાખવામાં આવે. દેશની સુરક્ષા સાથે ચેડાં કરનારાઓને કડક સજા થશે. હર્ષ સંઘવીએ ગુજરાત ATS ને અભિનંદન આપ્યા હતા અને જણાવ્યું હતું કે, કચ્છના આ નાગરિક દ્વારા કદાચ હનીટ્રેપમાં ફસાઈને આ માહિતી આપવામાં આવી હોવાની શક્યતા છે. જેની તપાસ ચાલી રહી છે, આ વ્યક્તિએ પોતાના નામે સીમકાર્ડ ખરીદીને તેના પર વ્હોટ્સએપ એક્ટિવ કરીને પાકિસ્તાની મહિલાને તેનું એક્સેસ આપવામાં આવ્યું હતું. આ કેસ હાલ જ ચાલી રહેલ યુટ્યૂબર જ્યોતિ મલ્હોત્રા જેવો જ કેસ ગણી શકાય”
આ ઘટના વડાપ્રધાન મોદીના ગુજરાત પ્રવાસના બે દિવસ પહેલાં બની છે, જેના કારણે સુરક્ષા એજન્સીઓએ વધુ સાવચેતી રાખવાનું શરૂ કર્યું છે. ગુજરાત ATSના એક વરિષ્ઠ અધિકારીએ જણાવ્યું કે, “પાકિસ્તાની ગુપ્તચર એજન્ટો સોશિયલ મીડિયા પ્લેટફોર્મ્સનો ઉપયોગ કરીને ભારતીય નાગરિકોને નાણાકીય પ્રોત્સાહન અથવા વ્યક્તિગત નબળાઈઓનો લાભ લઈને ફસાવે છે. આવા સમયે, જ્યારે રાજ્યમાં ઉચ્ચ સ્તરીય પ્રવાસનું આયોજન થઈ રહ્યું હોય, ત્યારે આવા કેસો ગંભીર ચિંતાનો વિષય છે.”
આ ઘટના ગુજરાતમાં છેલ્લા આઠ મહિનામાં જાસૂસીના આરોપમાં થયેલી ત્રીજી ધરપકડ છે, જે દર્શાવે છે કે પાકિસ્તાની ગુપ્તચર એજન્સીઓ દ્વારા સોશિયલ મીડિયા દ્વારા ભારતીય નાગરિકોને નિશાન બનાવવાની પ્રવૃત્તિ વધી રહી છે. ATSએ નાગરિકોને અજાણ્યા લોકો સાથે ઓનલાઈન સંપર્કમાં સાવધાની રાખવા અને કોઈપણ શંકાસ્પદ પ્રવૃત્તિની જાણ સુરક્ષા એજન્સીઓને કરવા અપીલ કરી છે.
નોંધ: આ તપાસ હજુ ચાલુ છે અને ફોરેન્સિક પરીક્ષણ બાદ વધુ વિગતો બહાર આવી શકે છે.
Related
ADVERTISEMENT
ADVERTISEMENT
E Paper
Video
Comments
Start the conversation
Become a member of New India Abroad to start commenting.
Sign Up Now
Already have an account? Login