ADVERTISEMENT
ADVERTISEMENT
ટ્રમ્પના દાવા છતાં હોર્મુઝ જળમાર્ગ પર ઈરાન દ્વારા પ્રતિબંધ યથાવત
ટ્રમ્પે કહ્યું હતું કે ઈરાનના સમૃદ્ધ યુરેનિયમ ભંડારને IAEA સાથે મળીને શોધી નષ્ટ કરવામાં આવશે.
-
IANS(ગુજરાતી) - Sun, 31, May 2026
- 04:29 EDT
- 28
હોર્મુઝની સામુદ્રધુની / (Morteza Akhoundi/ISNA/Handout via Xinhua/IANS)
ઈરાન પર લગાવવામાં આવેલ અમેરિકી નૌકાદળના પ્રતિબંધો હટાવી દેવાયા હોવાના અમેરિકી રાષ્ટ્રપતિ ડોનાલ્ડ ટ્રમ્પના દાવા છતાં, ઈરાનના જહાજોને હજુ પણ હોર્મુઝ જળમાર્ગમાંથી પસાર થવા દેવામાં આવી રહ્યા નથી. ઈરાનની અર્ધ-સરકારી તસ્નીમ ન્યૂઝ એજન્સીએ આ માહિતી આપી હતી.
અહેવાલ મુજબ, ઈરાની નાવિકોએ જણાવ્યું કે પ્રતિબંધો હજુ પણ યથાવત છે અને અમેરિકી સેન્ટ્રલ કમાન્ડ તરફથી જહાજોને આ વિસ્તારમાં પ્રવેશ ન કરવા ચેતવણીઓ આપવામાં આવી રહી છે.
ટ્રમ્પે 29 મેના રોજ Truth Social પર કરેલી પોસ્ટમાં કહ્યું હતું કે અમેરિકી નૌકાદળ દ્વારા લગાવવામાં આવેલ "બ્લોકેડ" હવે હટાવી લેવામાં આવશે.
આ જ પોસ્ટમાં ટ્રમ્પે ઈરાન સાથે સંભવિત કરાર માટે કેટલીક શરતો પણ મૂકી હતી. તેમણે કહ્યું હતું કે તેહરાને ક્યારેય પરમાણુ હથિયાર ન બનાવવાનો વચન આપવું પડશે. સાથે જ હોર્મુઝ જળમાર્ગ તરત જ સંપૂર્ણ રીતે ખોલી દેવામાં આવે અને બંને દિશામાં જહાજોની અવરજવર પર કોઈ પ્રતિબંધ ન રહે તેવી વાત પણ કરી હતી. તેમણે પાણીમાં પાથરવામાં આવેલા માઇન્સ દૂર કરવાની પણ વાત કરી હતી.
ટ્રમ્પે વધુમાં જણાવ્યું હતું કે ઈરાનના સમૃદ્ધ યુરેનિયમના જથ્થાને ઈરાન અને આંતરરાષ્ટ્રીય પરમાણુ ઊર્જા એજન્સી (IAEA) સાથે સંકલન કરીને શોધી નષ્ટ કરવામાં આવશે.
પરંતુ ઈરાને સ્પષ્ટ કર્યું છે કે હાલ ચાલી રહેલી ચર્ચાના આ તબક્કામાં પરમાણુ મુદ્દાઓ સામેલ નથી.
ઈરાનની મુખ્ય સૈન્ય કમાન્ડ 'ખાતમ અલ-અનબિયા સેન્ટ્રલ હેડક્વાર્ટર્સ'એ 30 મેના રોજ જણાવ્યું હતું કે હોર્મુઝ જળમાર્ગ પર ઈરાનના સશસ્ત્ર દળો સંપૂર્ણ સત્તા સાથે નિયંત્રણ રાખી રહ્યા છે. સરકારી સમાચાર એજન્સી IRNA મુજબ, નિવેદનમાં કહેવામાં આવ્યું હતું કે તમામ જહાજો જેમાં વેપારી જહાજો અને તેલ ટેન્કરો પણ સામેલ છે. ઈરાન દ્વારા નક્કી કરાયેલા માર્ગો પરથી જ પસાર થઈ શકે છે અને તેમને ઈસ્લામિક રેવોલ્યુશનરી ગાર્ડ કોર્પ્સ (IRGC)ની નૌકાદળ પાસેથી મંજૂરી લેવી ફરજિયાત રહેશે.
આ દરમિયાન, IRGCની નૌકાદળે જણાવ્યું હતું કે છેલ્લા 24 કલાકમાં 20 જહાજોએ તેમની દળો અને ઈરાનની સમુદ્રી સત્તાઓ સાથે સંકલન કરીને જળમાર્ગ પાર કર્યો હતો. અર્ધ-સરકારી ફાર્સ ન્યૂઝ એજન્સીએ આ માહિતી આપી હતી.
ફાર્સના અહેવાલ મુજબ, IRGC નૌકાદળના અધિકારીઓએ જણાવ્યું કે કેટલાક દેશોને રસાયણિક ખાતર જેવી જરૂરી ચીજવસ્તુઓની જરૂરિયાતને ધ્યાનમાં રાખીને આ જહાજોને પસાર થવાની મંજૂરી આપવામાં આવી હતી.
ઈરાને 28 ફેબ્રુઆરીએ હોર્મુઝ જળમાર્ગ પર નિયંત્રણ વધુ કડક બનાવ્યું હતું. ઈરાન પર થયેલા સંયુક્ત હુમલાઓ બાદ ઈઝરાયેલ અને અમેરિકા સાથે જોડાયેલા જહાજોની અવરજવર પર નિયંત્રણ મૂકવામાં આવ્યું હતું. બીજી તરફ, અમેરિકા પણ ઈરાનના બંદરો તરફ જતા અને ત્યાંથી આવતા જહાજો પર મર્યાદાઓ જાળવી રાખી રહ્યું છે.
ગુજરાતીમાં અન્ય સમાચારો વાંચવા અહીં ક્લિક કરો "ન્યુ ઇન્ડિયા અબ્રોડ ગુજરાતી"
Related
ADVERTISEMENT
ADVERTISEMENT
E Paper
Video
Comments
Start the conversation
Become a member of New India Abroad to start commenting.
Sign Up Now
Already have an account? Login