ADVERTISEMENT
ADVERTISEMENT
ਰਾਜਾ ਕ੍ਰਿਸ਼ਨਾਮੂਰਤੀ ਨੇ ਵਧਦੀ ਇਸਲਾਮੋਫੋਬੀਆ ਅਤੇ ਯਹੂਦੀ-ਵਿਰੋਧੀ ਨਫ਼ਰਤ 'ਤੇ ਪ੍ਰਗਟਾਈ ਚਿੰਤਾ
ਇਹ ਟਿੱਪਣੀਆਂ 18 ਮਈ ਨੂੰ ਇਸਲਾਮਿਕ ਸੈਂਟਰ ਵਿੱਚ ਹੋਈ ਗੋਲੀਬਾਰੀ ਤੋਂ ਬਾਅਦ ਆਈਆਂ ਹਨ
-
ਮਾਲਵਿਕਾ ਚੌਧਰੀ - Fri, 22, May 2026
- 12:17 EDT
- 14
ਰਾਜਾ ਕ੍ਰਿਸ਼ਨਾਮੂਰਤੀ / X/@CongressmanRaja
ਕਾਂਗਰਸਮੈਨ ਰਾਜਾ ਕ੍ਰਿਸ਼ਨਾਮੂਰਤੀ ਨੇ 20 ਮਈ ਨੂੰ 9/11 ਦੇ ਹਮਲਿਆਂ ਦੀ 25ਵੀਂ ਬਰਸੀ ਦੇ ਮੌਕੇ 'ਤੇ ਆਯੋਜਿਤ ਹਾਊਸ ਇੰਟੈਲੀਜੈਂਸ ਦੀ ਸੁਣਵਾਈ ਦੌਰਾਨ ਵਧਦੇ ਇਸਲਾਮੋਫੋਬੀਆ (ਮੁਸਲਿਮ-ਵਿਰੋਧੀ ਨਫ਼ਰਤ) ਅਤੇ ਯਹੂਦੀ-ਵਿਰੋਧੀ (antisemitism) ਨਫ਼ਰਤ 'ਤੇ ਡੂੰਘੀ ਚਿੰਤਾ ਪ੍ਰਗਟਾਈ। ਇਹ ਬਿਆਨ ਸੈਨ ਡਿਏਗੋ ਦੀ ਇੱਕ ਮਸਜਿਦ ਵਿੱਚ ਤਿੰਨ ਲੋਕਾਂ ਦੇ ਮਾਰੇ ਜਾਣ ਤੋਂ ਕੁਝ ਦਿਨਾਂ ਬਾਅਦ ਆਇਆ ਹੈ। ਕਮੇਟੀ ਦੇ ਇੱਕ ਸੀਨੀਅਰ ਮੈਂਬਰ ਕ੍ਰਿਸ਼ਨਾਮੂਰਤੀ ਨੇ ਕਿਹਾ ਕਿ 9/11 ਦੇ ਹਮਲਿਆਂ ਤੋਂ ਦੋ ਦਹਾਕਿਆਂ ਤੋਂ ਵੱਧ ਸਮਾਂ ਬੀਤ ਜਾਣ ਦੇ ਬਾਅਦ ਵੀ ਅਮਰੀਕਾ ਵਿੱਚ ਮੁਸਲਿਮ-ਵਿਰੋਧੀ ਭਾਵਨਾਵਾਂ ਬਰਕਰਾਰ ਹਨ।
ਸੁਣਵਾਈ ਦੌਰਾਨ ਕ੍ਰਿਸ਼ਨਾਮੂਰਤੀ ਨੇ ਕਿਹਾ, “9/11 ਦੀ ਘਟਨਾ ਨੂੰ ਵੀਹ ਸਾਲਾਂ ਤੋਂ ਵੱਧ ਸਮਾਂ ਹੋ ਜਾਣ ਦੇ ਬਾਅਦ ਵੀ ਅਮਰੀਕਾ ਵਿੱਚ ਇਸਲਾਮੋਫੋਬੀਆ ਖ਼ਤਮ ਨਹੀਂ ਹੋਇਆ ਹੈ। ਅਸੀਂ ਇਸੇ ਹਫ਼ਤੇ ਦੇ ਅੰਤ ਵਿੱਚ ਸੈਨ ਡਿਏਗੋ ਦੀ ਇੱਕ ਮਸਜਿਦ ਵਿੱਚ ਤਿੰਨ ਲੋਕਾਂ ਦਾ ਭਿਆਨਕ ਕਤਲ ਦੇਖਿਆ ਹੈ।” ਸੁਣਵਾਈ ਦੌਰਾਨ, ਕ੍ਰਿਸ਼ਨਾਮੂਰਤੀ ਨੇ ਗਵਾਹਾਂ ਨੂੰ ਪੁੱਛਿਆ ਕਿ ਕੀ ਉਹ ਇਸ ਗੱਲ ਨਾਲ ਸਹਿਮਤ ਹਨ ਕਿ "ਅਮਰੀਕਾ ਵਿੱਚ ਇਸਲਾਮੋਫੋਬੀਆ ਅਤੇ ਨਫ਼ਰਤ ਲਈ ਕੋਈ ਥਾਂ ਨਹੀਂ ਹੈ," ਜਿਸ 'ਤੇ ਸਾਰਿਆਂ ਨੇ ਸਰਬਸੰਮਤੀ ਨਾਲ ਸਹਿਮਤੀ ਜਤਾਈ। ਗਵਾਹਾਂ ਵਿੱਚ ਜਮਾਲ ਜਾਫ਼ਰ ਵੀ ਸ਼ਾਮਲ ਸਨ, ਜਿਨ੍ਹਾਂ ਨੇ ਆਪਣੀ ਪਛਾਣ ਮੁਸਲਮਾਨ ਵਜੋਂ ਦੱਸੀ ਅਤੇ ਕਿਹਾ ਕਿ ਸੰਯੁਕਤ ਰਾਜ ਵਿੱਚ ਯਹੂਦੀ-ਵਿਰੋਧੀ ਅਤੇ ਮੁਸਲਿਮ-ਵਿਰੋਧੀ ਨਫ਼ਰਤ ਦੋਵੇਂ ਇੱਕੋ ਸਮੇਂ ਵਧ ਰਹੇ ਹਨ।
ਜਾਫ਼ਰ ਨੇ ਕਿਹਾ, "ਇੱਕ ਮੁਸਲਮਾਨ ਹੋਣ ਦੇ ਨਾਤੇ, ਮੈਨੂੰ ਇਸਲਾਮੋਫੋਬੀਆ ਪਸੰਦ ਨਹੀਂ ਹੈ। ਅਸੀਂ ਇੱਥੇ ਸੰਯੁਕਤ ਰਾਜ ਵਿੱਚ ਇਹਨਾਂ ਦੋਵਾਂ ਰੁਝਾਨਾਂ—ਯਹੂਦੀ-ਵਿਰੋਧੀ ਅਤੇ ਇਸਲਾਮ-ਵਿਰੋਧੀ ਨਫ਼ਰਤ—ਵਿੱਚ ਉਛਾਲ ਦੇਖਿਆ ਹੈ।" ਜਾਫ਼ਰ ਨੇ ਅੱਗੇ ਕਿਹਾ ਕਿ "ਜਿਹੜੇ ਲੋਕ ਯਹੂਦੀ ਲੋਕਾਂ ਨਾਲ ਨਫ਼ਰਤ ਕਰਦੇ ਹਨ, ਉਹ ਮੁਸਲਮਾਨਾਂ ਨਾਲ ਵੀ ਓਹਨੀ ਹੀ ਨਫ਼ਰਤ ਕਰਦੇ ਹਨ," ਅਤੇ ਉਨ੍ਹਾਂ ਕਿਹਾ ਕਿ ਅਮਰੀਕੀ ਲੋਕ "ਇੱਕ ਦੂਜੇ ਦੇ ਗਲ ਪੈਣ ਨਾਲੋਂ ਇਕੱਠੇ ਰਹਿ ਕੇ ਵਧੇਰੇ ਮਜ਼ਬੂਤ" ਹਨ।
ਕ੍ਰਿਸ਼ਨਾਮੂਰਤੀ ਨੇ ਕੁਝ ਚੁਣੇ ਹੋਏ ਅਧਿਕਾਰੀਆਂ ਦੇ ਉਸ ਬਿਆਨਬਾਜ਼ੀ ਦੀ ਵੀ ਆਲੋਚਨਾ ਕੀਤੀ ਜੋ ਮੁਸਲਮਾਨਾਂ ਨੂੰ ਅੱਤਵਾਦ ਨਾਲ ਜੋੜਦੇ ਹਨ ਅਤੇ "ਹੋਰ ਇਸਲਾਮੋਫੋਬੀਆ" ਦੀ ਮੰਗ ਕਰਦੇ ਹਨ। ਉਨ੍ਹਾਂ ਕਿਹਾ, “ਅਮਰੀਕਾ ਵਿੱਚ ਨਫ਼ਰਤ ਲਈ ਕੋਈ ਥਾਂ ਨਹੀਂ ਹੈ ਅਤੇ ਇਹ ਸਾਡੀਆਂ ਸਾਰੀਆਂ ਕਦਰਾਂ-ਕੀਮਤਾਂ ਦੇ ਉਲਟ ਹੈ।” ਇਲੀਨੋਏਸ ਦੇ ਡੈਮੋਕ੍ਰੇਟਿਕ ਆਗੂ ਨੇ ਐਫ.ਬੀ.ਆਈ. ਦੇ ਅੱਤਵਾਦ-ਵਿਰੋਧੀ ਸਰੋਤਾਂ ਨੂੰ ਇਮੀਗ੍ਰੇਸ਼ਨ ਕਾਨੂੰਨ ਲਾਗੂ ਕਰਨ ਵੱਲ ਮੋੜਨ 'ਤੇ ਵੀ ਚਿੰਤਾ ਜਤਾਈ। ਉਨ੍ਹਾਂ ਦਲੀਲ ਦਿੱਤੀ ਕਿ ਇਸ ਕਦਮ ਨਾਲ ਰਾਸ਼ਟਰੀ ਸੁਰੱਖਿਆ ਦੇ ਯਤਨ ਕਮਜ਼ੋਰ ਹੋ ਸਕਦੇ ਹਨ। ਕ੍ਰਿਸ਼ਨਾਮੂਰਤੀ ਨੇ ਕਿਹਾ, "ਮੇਰੇ ਲਈ ਇਹ ਹੈਰਾਨੀਜਨਕ ਸੀ ਕਿ ਐਫ.ਬੀ.ਆਈ. ਨੇ ਰਾਸ਼ਟਰਪਤੀ ਦੇ ਇਮੀਗ੍ਰੇਸ਼ਨ ਏਜੰਡੇ ਦਾ ਸਮਰਥਨ ਕਰਨ ਲਈ ਜੇ.ਟੀ.ਟੀ.ਐਫ. ਵਰਗੇ ਅੱਤਵਾਦ-ਵਿਰੋਧੀ ਯਤਨਾਂ ਦੇ ਸਰੋਤਾਂ ਨੂੰ ਦੂਜੇ ਪਾਸੇ ਮੋੜ ਦਿੱਤਾ।"
ਸੀਨੇਟ ਦੀ ਇੰਟੈਲੀਜੈਂਸ ਕਮੇਟੀ ਦੇ ਵਾਈਸ ਚੇਅਰਮੈਨ ਮਾਰਕ ਵਾਰਨਰ ਤੋਂ ਪ੍ਰਾਪਤ ਅੰਕੜਿਆਂ ਦਾ ਹਵਾਲਾ ਦਿੰਦੇ ਹੋਏ ਕ੍ਰਿਸ਼ਨਾਮੂਰਤੀ ਨੇ ਦੱਸਿਆ ਕਿ ਪ੍ਰਮੁੱਖ ਫੀਲਡ ਦਫ਼ਤਰਾਂ ਦੇ ਲਗਭਗ 45 ਪ੍ਰਤੀਸ਼ਤ ਐਫ.ਬੀ.ਆਈ. ਏਜੰਟਾਂ ਨੂੰ ਇਮੀਗ੍ਰੇਸ਼ਨ ਐਂਡ ਕਸਟਮਜ਼ ਇਨਫੋਰਸਮੈਂਟ (ICE) ਦੇ ਕੰਮਾਂ ਵਿੱਚ ਸਹਾਇਤਾ ਲਈ ਅੱਤਵਾਦ-ਵਿਰੋਧੀ, ਖੁਫੀਆ-ਵਿਰੋਧੀ ਅਤੇ ਇਸ ਨਾਲ ਸਬੰਧਤ ਕੰਮਾਂ ਤੋਂ ਹਟਾ ਕੇ ਤਾਇਨਾਤ ਕੀਤਾ ਗਿਆ ਸੀ। ਉਨ੍ਹਾਂ ਕਿਹਾ, "ਮੈਨੂੰ ਲੱਗਦਾ ਹੈ ਕਿ ਇਹ ਬਿਲਕੁਲ ਗਲਤ ਹੈ। ਮੇਰਾ ਮੰਨਣਾ ਹੈ ਕਿ ਇਹ ਇੱਕ ਦੇਸ਼ ਵਜੋਂ ਸਾਨੂੰ ਘੱਟ ਸੁਰੱਖਿਅਤ ਬਣਾਉਂਦਾ ਹੈ।"
ਇਹ ਟਿੱਪਣੀਆਂ 18 ਮਈ ਨੂੰ ਸੈਨ ਡਿਏਗੋ ਦੇ ਇਸਲਾਮਿਕ ਸੈਂਟਰ ਵਿੱਚ ਦੋ ਨਾਬਾਲਗ ਬੰਦੂਕਧਾਰੀਆਂ ਵੱਲੋਂ ਕੀਤੀ ਗਈ ਗੋਲੀਬਾਰੀ ਤੋਂ ਬਾਅਦ ਆਈਆਂ ਹਨ, ਜਿਸ ਵਿੱਚ ਤਿੰਨ ਲੋਕਾਂ ਦੀ ਮੌਤ ਹੋ ਗਈ ਸੀ। ਮਰਨ ਵਾਲਿਆਂ ਵਿੱਚ ਮਸਜਿਦ ਦਾ ਇੱਕ ਸੁਰੱਖਿਆ ਗਾਰਡ ਵੀ ਸ਼ਾਮਲ ਸੀ, ਜਿਸ ਬਾਰੇ ਅਧਿਕਾਰੀਆਂ ਨੇ ਦੱਸਿਆ ਕਿ ਉਸਨੇ ਅੰਦਰ ਮੌਜੂਦ ਨਮਾਜ਼ੀਆਂ ਅਤੇ ਵਿਦਿਆਰਥੀਆਂ ਨੂੰ ਸੁਚੇਤ ਕਰਕੇ ਇੱਕ ਵੱਡੀ ਤ੍ਰਾਸਦੀ ਨੂੰ ਰੋਕਣ ਵਿੱਚ ਮਦਦ ਕੀਤੀ ਸੀ। ਜਾਂਚਕਰਤਾਵਾਂ ਨੇ ਦੱਸਿਆ ਕਿ ਹਮਲਾਵਰਾਂ ਕੋਲੋਂ ਬਰਾਮਦ ਹੋਈਆਂ ਲਿਖਤਾਂ ਤੋਂ ਅੱਤਵਾਦੀ ਨਸਲੀ ਅਤੇ ਧਾਰਮਿਕ ਨਫ਼ਰਤ ਝਲਕਦੀ ਸੀ।
Related
ADVERTISEMENT
ADVERTISEMENT
E Paper
Video
Comments
Start the conversation
Become a member of New India Abroad to start commenting.
Sign Up Now
Already have an account? Login