ADVERTISEMENT
ADVERTISEMENT
કૃષ્ણ વાવિલાલાને BITS પિલાનીનો વિશિષ્ટ સેવા પુરસ્કાર
સન્માન સમારોહ દરમિયાન વાવિલાલાએ ભારત, ઇંગ્લેન્ડ અને અમેરિકામાં ફેલાયેલી પોતાની વ્યાવસાયિક સફરને યાદ કરી.
-
1749580004.png)
જુહી વર્મા - Sun, 16, Aug 2026
- 06:02 EDT
- 8
કૃષ્ણ એસ. વાવિલાલા / Juhi Varma
કૃષ્ણ એસ. વાવિલાલાને 11 ઓગસ્ટ, 2026ના રોજ હ્યુસ્ટનમાં આવેલા ભારતના કોન્સ્યુલેટ જનરલ ખાતે આયોજિત સમારોહમાં BITS પિલાનીના Distinguished Service Award 2026થી સન્માનિત કરવામાં આવ્યા હતા. હ્યુસ્ટરમાં લાંબા સમયથી વસવાટ કરતા વાવિલાલા બિરલા ઇન્સ્ટિટ્યૂટ ઑફ ટેક્નોલોજી એન્ડ સાયન્સ (BITS) પિલાનીના ઇલેક્ટ્રિકલ એન્જિનિયરિંગના ભૂતપૂર્વ વિદ્યાર્થી છે.
લગભગ 15 લોકોની હાજરીમાં યોજાયેલા આ સ્નેહમિલન જેવા બપોરના ભોજન સમારોહમાં BITSના ભૂતપૂર્વ વિદ્યાર્થીઓ, સમુદાયના આગેવાનો અને વાવિલાલાના શુભેચ્છકો ઉપસ્થિત રહ્યા હતા. આ કાર્યક્રમનું આયોજન ભારતના કોન્સ્યુલ જનરલ ડી. સી. મંજુનાથે કર્યું હતું. 1956-60ની બેચના સ્નાતક વાવિલાલાને શિક્ષણ, સંસ્કૃતિ, જાહેર સેવા અને સમુદાયના સશક્તિકરણ માટે જીવનભર આપેલા યોગદાન બદલ આ સન્માન આપવામાં આવ્યું હતું.
સન્માન સમારોહ દરમિયાન વાવિલાલાએ ભારત, ઇંગ્લેન્ડ અને અમેરિકામાં ફેલાયેલી પોતાની વ્યાવસાયિક સફરને યાદ કરી હતી. તેમણે જણાવ્યું હતું કે BITS પિલાનીમાં મળેલા શિક્ષણે તેમને સ્વતંત્ર રીતે વિચારવાની અને સમસ્યાઓ ઉકેલવાની ક્ષમતા અને આત્મવિશ્વાસ આપ્યો. તેમણે પોતાની પત્ની લક્ષ્મી, પુત્રી અમાન્ડા અને પૌત્ર આનંદના સહયોગ બદલ પણ આભાર વ્યક્ત કર્યો હતો.
તેમણે કહ્યું, “મારા સાથી BITSiansને હું એટલું જ કહીશ કે BITSની સૌથી મોટી સંપત્તિ માત્ર ત્યાં આપણે મેળવેલું શિક્ષણ નથી, પરંતુ BITSians તરીકે આપણી વચ્ચેનું આજીવન બંધન છે. અને યુવા પેઢી માટે મારો સંદેશ સરળ છે. સાચી સફળતા માત્ર આપણે શું હાંસલ કરીએ છીએ તેનાથી નહીં, પરંતુ સમાજ માટે આપણે શું યોગદાન આપીએ છીએ તેનાથી માપવામાં આવે છે. પ્રતિબદ્ધતા મહત્વપૂર્ણ છે. બાકી બધું માત્ર બહાનું છે.”
આ સન્માન બદલ આભાર વ્યક્ત કરતાં વાવિલાલાએ BITS પિલાનીના વિદ્યાર્થીઓ માટે સ્કોલરશિપ ફંડમાં 10,000 અમેરિકન ડોલર આપવાની જાહેરાત કરી. દાયકાઓથી હ્યુસ્ટન વિસ્તારમાં રહેતા વાવિલાલા 2005માં સ્થાપિત થયેલી બિનનફાકારક 501(c)(3) સંસ્થા Foundation for India Studies Inc.ના સ્થાપક અને અધ્યક્ષ છે.
વર્ષોથી શિક્ષણ, સાંસ્કૃતિક સમજણ અને ભારતીય-અમેરિકનોના ઇતિહાસને પ્રોત્સાહન આપવા બદલ તેમને અમેરિકી સરકાર તરફથી અનેક ટ્રોફી અને મેડલ મળ્યા છે. આ સન્માન એવા સમયે મળ્યું છે જ્યારે વિશ્વભરના BITSiansએ 7થી 9 ઓગસ્ટ દરમિયાન BITSians Dayની 25મી વર્ષગાંઠની ઉજવણી કરી હતી.
ભારતના કોન્સ્યુલ જનરલ ડી. સી. મંજુનાથે જણાવ્યું કે તેઓ ત્રણ વર્ષ પહેલાં વાવિલાલાને મળ્યા હતા. તે સમયે વાવિલાલાએ ભારતના ચંદ્રયાન-3ના ચંદ્ર પર સફળ ઉતરાણની ઉજવણી માટે કોન્સ્યુલેટમાં યોજાનારા કાર્યક્રમ પહેલાં તેમનો સંપર્ક કર્યો હતો.
મંજુનાથે કહ્યું કે ત્યારથી તેઓ વિવિધ કાર્યક્રમોમાં સાથે મળીને કામ કરી રહ્યા છે. તાજેતરમાં રાઇસ યુનિવર્સિટી સાથે મળીને હ્યુસ્ટનના ભારતીય ડાયસ્પોરાના ઇતિહાસ અને તેમની સિદ્ધિઓને દસ્તાવેજીકૃત કરી તેનું સંરક્ષણ કરવાના પ્રયાસનો પણ તેમણે ઉલ્લેખ કર્યો હતો. તેમણે આ પહેલને ખૂબ જ પ્રશંસનીય ગણાવી હતી.
વાવિલાલાના નજીકના મિત્ર અને સહ-ઇલેક્ટ્રિકલ એન્જિનિયર પ્રશાંત બેન્દ્રેએ તેમના અન્ય મહત્વપૂર્ણ યોગદાનને યાદ કરતાં જણાવ્યું કે 2004માં હ્યુસ્ટનમાં મહાત્મા ગાંધીની પ્રતિમા સ્થાપિત કરવામાં તેમની મહત્વની ભૂમિકા હતી. તેમણે કહ્યું કે વાવિલાલા ગાંધીજીથી લાંબા સમયથી પ્રેરિત રહ્યા છે. ગાંધીજી 1947માં વાવિલાલાના વતન પણ ગયા હતા.
હ્યુસ્ટનમાં આવેલી ગાંધીજીની પ્રતિમા અંગે બેન્દ્રેએ જણાવ્યું કે આ પ્રતિમા આજે પણ મુલાકાતીઓને ગાંધીજીના વિચારો અને અહિંસાના સિદ્ધાંતની વૈશ્વિક અસરની યાદ અપાવે છે. તેમણે ઉમેર્યું કે સમુદાય સેવા અને સાંસ્કૃતિક રાજદ્વારી ક્ષેત્રે વાવિલાલાના એક દાયકાથી વધુ સમયના યોગદાનને કારણે તેમને અનેક સન્માન મળ્યાં છે.
આ સન્માનોમાં 2022માં મળેલો U.S. Presidential Lifetime Achievement Award પણ સામેલ છે, જે તેમને વ્હાઇટ હાઉસ ખાતે સમાજમાં પરિવર્તન લાવનાર અને વૈશ્વિક સંવાદક તરીકેની તેમની ભૂમિકા બદલ આપવામાં આવ્યો હતો. વાવિલાલા આજે પણ Foundation for India Studiesના સ્થાપક અને અધ્યક્ષ તરીકે સેવા આપી રહ્યા છે અને સમુદાયના વિકાસ તથા કલ્યાણ માટે પોતાનો સમય અને પ્રયાસો સમર્પિત કરી રહ્યા છે.
ગુજરાતીમાં અન્ય સમાચારો વાંચવા અહીં ક્લિક કરો "ન્યુ ઇન્ડિયા અબ્રોડ ગુજરાતી"
Leave A Comment
Related
ADVERTISEMENT
ADVERTISEMENT
E Paper
Video
Comments
Start the conversation
Become a member of New India Abroad to start commenting.
Sign Up Now
Already have an account? Login