2025 ਨੂੰ ਪਰਿਭਾਸ਼ਿਤ ਕਰਨ ਵਾਲੀਆਂ 10 ਵੱਡੀਆਂ ਘਟਨਾਵਾਂ / AI image

ਡੋਨਾਲਡ ਟਰੰਪ ਦੀ ਸੱਤਾ ਵਿੱਚ ਵਾਪਸੀ, ਗਾਜ਼ਾ ਵਿੱਚ ਸੀਜ਼ਫ਼ਾਇਰ ਅਤੇ ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਵਿੱਚ ਭਾਰੀ ਨਿਵੇਸ਼— ਇਹ ਉਹ ਘਟਨਾਵਾਂ ਹਨ, ਜਿਨ੍ਹਾਂ ਨੇ 2025 ਨੂੰ ਪਰਿਭਾਸ਼ਿਤ ਕੀਤਾ।

1. ਟਰੰਪ ਦੀ ਵਾਪਸੀ: ਇੱਕ ਸਖ਼ਤ ਹਮਲਾਵਰ ਰੁਖ

ਜਨਵਰੀ ਵਿੱਚ ਆਪਣੇ ਦੂਜੇ ਕਾਰਜਕਾਲ ਲਈ ਵ੍ਹਾਈਟ ਹਾਊਸ ਪਰਤਣ ਤੋਂ ਬਾਅਦ, ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਗੈਰ-ਕਾਨੂੰਨੀ ਪ੍ਰਵਾਸੀਆਂ ਨੂੰ ਵੱਡੇ ਪੱਧਰ 'ਤੇ ਦੇਸ਼ ਨਿਕਾਲਾ ਦੇਣ ਅਤੇ ਸੰਘੀ ਸਰਕਾਰ ਦੇ ਕਈ ਵਿਭਾਗਾਂ ਨੂੰ ਭੰਗ ਕਰਨ ਦਾ ਕੰਮ ਸ਼ੁਰੂ ਕੀਤਾ। ਉਨ੍ਹਾਂ ਨੇ ਵਿਰੋਧੀਆਂ ਨੂੰ ਨਿਸ਼ਾਨਾ ਬਣਾਇਆ, ਡੈਮੋਕਰੇਟਿਕ ਸ਼ਹਿਰਾਂ ਵਿੱਚ ਨੈਸ਼ਨਲ ਗਾਰਡ ਤਾਇਨਾਤ ਕੀਤੇ ਅਤੇ ਮੀਡੀਆ ਨੂੰ ਡਰਾਉਣ ਦੀ ਕੋਸ਼ਿਸ਼ ਕੀਤੀ। ਹਾਲਾਂਕਿ, ਵਧਦੀ ਮਹਿੰਗਾਈ ਕਾਰਨ ਜਨਤਾ ਵਿੱਚ ਬੇਚੈਨੀ ਵਧੀ ਹੈ ਅਤੇ ਸਥਾਨਕ ਚੋਣਾਂ ਵਿੱਚ ਹਾਰ ਨੇ ਉਨ੍ਹਾਂ ਦੀ ਪਾਰਟੀ ਨੂੰ ਮੁਸ਼ਕਲ ਸਥਿਤੀ ਵਿੱਚ ਪਾ ਦਿੱਤਾ ਹੈ।

2. ਗਾਜ਼ਾ ਵਿੱਚ ਸੀਜ਼ਫ਼ਾਇਰ

ਅਮਰੀਕੀ ਦਬਾਅ ਸਦਕਾ ਇਜ਼ਰਾਈਲ ਅਤੇ ਹਮਾਸ ਵਿਚਕਾਰ ਜੰਗਬੰਦੀ ਹੋਈ। ਇਸ ਸਮਝੌਤੇ ਨਾਲ ਇਜ਼ਰਾਈਲੀ ਬੰਦੀਆਂ ਤੇ ਮਾਰੇ ਗਏ ਲੋਕਾਂ ਦੀਆਂ ਜ਼ਿਆਦਾਤਰ ਲਾਸ਼ਾਂ ਦੀ ਵਾਪਸੀ ਅਤੇ ਫਲਸਤੀਨੀ ਕੈਦੀਆਂ ਦੀ ਰਿਹਾਈ ਸੰਭਵ ਹੋ ਸਕੀ। ਹਾਲਾਂਕਿ ਗਾਜ਼ਾ ਵਿੱਚ ਮਨੁੱਖੀ ਸਹਾਇਤਾ ਵਧੀ ਹੈ, ਪਰ ਸੰਯੁਕਤ ਰਾਸ਼ਟਰ ਅਤੇ ਮਾਨਵਤਾਵਾਦੀ ਸੰਸਥਾਵਾਂ ਮੁਤਾਬਕ ਇਹ ਅਜੇ ਵੀ ਲੋੜ ਤੋਂ ਬਹੁਤ ਘੱਟ ਹੈ।

ਹਾਲੀਆ ਹਫ਼ਤਿਆਂ ਵਿੱਚ ਇਜ਼ਰਾਈਲ ਨੇ ਗਾਜ਼ਾ ਵਿੱਚ ਕਈ ਘਾਤਕ ਹਵਾਈ ਹਮਲੇ ਕੀਤੇ, ਜਿਨ੍ਹਾਂ ਨੂੰ ਉਸ ਨੇ ਹਮਾਸ ਦੇ ਹਮਲਿਆਂ ਦੇ ਜਵਾਬ ਵਜੋਂ ਦੱਸਿਆ। ਜੂਨ ਵਿੱਚ ਇਜ਼ਰਾਈਲ ਨੇ ਅਮਰੀਕਾ ਦੀ ਮਦਦ ਨਾਲ, ਈਰਾਨ ਦੀਆਂ ਪਰਮਾਣੂ ਸਹੂਲਤਾਂ ‘ਤੇ 12 ਦਿਨਾਂ ਦੀ ਜੰਗ ਦੌਰਾਨ ਛਾਪੇ ਮਾਰੇ। ਸਤੰਬਰ ਵਿੱਚ, ਕਤਰ ਵਿੱਚ ਹਮਾਸ ਅਧਿਕਾਰੀਆਂ ਨੂੰ ਨਿਸ਼ਾਨਾ ਬਣਾਉਂਦਾ ਇੱਕ ਹਮਲਾ ਵੀ ਕੀਤਾ ਗਿਆ।

3. ਯੂਕਰੇਨ ‘ਤੇ ਅਸਫ਼ਲ ਗੱਲਬਾਤ

ਟਰੰਪ ਦੀ ਵ੍ਹਾਈਟ ਹਾਊਸ ਵਿੱਚ ਆਮਦ ਨਾਲ ਯੂਕਰੇਨੀ ਜੰਗ ਖ਼ਤਮ ਕਰਨ ਲਈ ਕੋਸ਼ਿਸ਼ਾਂ ਨੂੰ ਰਫ਼ਤਾਰ ਮਿਲੀ—ਇਹ ਜੰਗ 2022 ਵਿੱਚ ਰੂਸ ਦੇ ਹਮਲੇ ਨਾਲ ਸ਼ੁਰੂ ਹੋਈ ਸੀ। ਟਰੰਪ ਦੀ ਹਮਦਰਦੀ ਕਦੇ ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਦੀਮੀਰ ਜ਼ੇਲੇਨਸਕੀ ਵੱਲ, ਕਦੇ ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਵੱਲ ਹੁੰਦੀ ਰਹੀ। ਫ਼ਰਵਰੀ ਵਿੱਚ, ਟਰੰਪ ਨੇ ਓਵਲ ਆਫ਼ਿਸ ਵਿੱਚ ਜ਼ੇਲੇਨਸਕੀ ਨੂੰ ਝਿੜਕਿਆ, ਉਸ ‘ਤੇ ਤੀਜੀ ਵਿਸ਼ਵ ਜੰਗ ਦਾ ਖ਼ਤਰਾ ਮੋਲ ਲੈਣ ਅਤੇ ਅਮਰੀਕੀ ਲੋਕਾਂ ਦੀ ਬੇਜ਼ਤੀ ਕਰਨ ਦੇ ਦੋਸ਼ ਲਗਾਏ।

ਰੂਸ-ਯੂਕਰੇਨ ਸਿੱਧੀ ਗੱਲਬਾਤ ਨਾਕਾਮ ਰਹੀ, ਤਾਂ ਅਗਸਤ ਵਿੱਚ ਟਰੰਪ ਨੇ ਅਲਾਸਕਾ ਵਿੱਚ ਪੁਤਿਨ ਨਾਲ ਇੱਕ ਸਿਖਰ ਸਮਾਗਮ ਕਰਵਾਇਆ, ਜੋ ਬਿਨਾਂ ਕਿਸੇ ਠੋਸ ਨਤੀਜੇ ਦੇ ਜਲਦੀ ਖ਼ਤਮ ਹੋ ਗਿਆ। ਵਾਸ਼ਿੰਗਟਨ ਨੇ ਮਾਸਕੋ ‘ਤੇ ਜੰਗ ਖ਼ਤਮ ਕਰਨ ਲਈ ਗੰਭੀਰ ਨਾ ਹੋਣ ਦਾ ਦੋਸ਼ ਲਗਾਇਆ। ਬਾਅਦ ਵਿੱਚ, ਟਰੰਪ ਨੇ ਰੂਸ ‘ਤੇ ਪਹਿਲਾ ਪਾਬੰਦੀਆਂ ਦਾ ਪੈਕੇਜ ਲਾਗੂ ਕੀਤਾ।

ਨਵੰਬਰ ਦੇ ਅੰਤ ਵਿੱਚ ਅੰਤਰਰਾਸ਼ਟਰੀ ਗੱਲਬਾਤ ਹੋਈ। ਇਸ ਦੌਰਾਨ, ਰੂਸੀ ਫੌਜਾਂ ਨੇ ਭਾਰੀ ਮਨੁੱਖੀ ਅਤੇ ਵਿੱਤੀ ਨੁਕਸਾਨ ਦੇ ਬਾਵਜੂਦ ਹੌਲੀ-ਹੌਲੀ ਅੱਗੇ ਵੱਧਦਿਆਂ ਯੂਕਰੇਨੀ ਸ਼ਹਿਰਾਂ ‘ਤੇ ਰਿਕਾਰਡ ਗਿਣਤੀ ਵਿੱਚ ਮਿਜ਼ਾਈਲਾਂ ਨਾਲ ਅਤੇ ਡ੍ਰੋਨ ਹਮਲੇ ਕੀਤੇ।

4. ਗਲੋਬਲ ਵਪਾਰਕ ਜੰਗ

ਟਰੰਪ ਨੇ ਦਰਾਮਦਾਂ ਅਤੇ ਸਟੀਲ, ਐਲੂਮੀਨੀਅਮ ਤੇ ਤਾਂਬੇ ਵਰਗੇ ਰਣਨੀਤਕ ਮੰਨੇ ਜਾਣ ਵਾਲੇ ਸਮੁੱਚੇ ਉਦਯੋਗਾਂ 'ਤੇ ਭਾਰੀ ਟੈਰਿਫ ਲਗਾ ਦਿੱਤੇ, ਜਿਸ ਨਾਲ ਇੱਕ ਵਪਾਰਕ ਵਿਵਾਦ ਪੈਦਾ ਹੋ ਗਿਆ ਅਤੇ ਵਿਸ਼ਵ ਆਰਥਿਕਤਾ ਨੂੰ ਹਿਲਾ ਕੇ ਰੱਖ ਦਿੱਤਾ। ਚੀਨ ਅਤੇ ਯੂਰਪੀ ਸੰਘ ਨਾਲ ਕਈ ਸਮਝੌਤੇ ਹੋਏ। ਅਮਰੀਕੀ ਅਧਿਕਾਰੀ ਅਜੇ ਵੀ ਮੈਕਸੀਕੋ ਨਾਲ ਗੱਲਬਾਤ ਕਰ ਰਹੇ ਹਨ, ਪਰ ਕੈਨੇਡਾ ਦੇ ਇੱਕ ਸੂਬੇ ਵੱਲੋਂ ਟੈਰਿਫਾਂ ਦੀ ਆਲੋਚਨਾ ਕਰਨ ਵਾਲੇ ਇਸ਼ਤਿਹਾਰ ਨੂੰ ਫੰਡ ਦੇਣ ਤੋਂ ਬਾਅਦ ਕੈਨੇਡਾ ਨਾਲ ਗੱਲਬਾਤ ਰੋਕ ਦਿੱਤੀ ਗਈ ਸੀ। ਅਮਰੀਕੀਆਂ ਲਈ ਰਹਿਣ-ਸਹਿਣ ਦੀ ਲਾਗਤ ਨੂੰ ਘਟਾਉਣ ਦੇ ਦਬਾਅ ਹੇਠ, ਟਰੰਪ ਨੇ ਨਵੰਬਰ ਦੇ ਅੱਧ ਵਿੱਚ ਕੁਝ ਖਾਧ ਪਦਾਰਥਾਂ, ਜਿਵੇਂ ਕਿ ਦਰਾਮਦ ਕੀਤੀ ਕੌਫੀ ਅਤੇ ਬੀਫ 'ਤੇ ਟੈਰਿਫ ਰੱਦ ਕਰਨ ਦਾ ਫੈਸਲਾ ਕੀਤਾ। 

5. ਨਵਾਂ ਪੋਪ

8 ਮਈ ਨੂੰ 69 ਸਾਲਾ ਰੌਬਰਟ ਫਰਾਂਸਿਸ ਪ੍ਰੇਵੋਸਟ ਕੈਥੋਲਿਕ ਚਰਚ ਦੇ 267ਵੇਂ ਮੁਖੀ ਵਜੋਂ ਚੁਣੇ ਗਏ ਅਤੇ ਪਹਿਲੇ ਅਮਰੀਕੀ ਪੋਪ ਬਣੇ। ਸ਼ਿਕਾਗੋ ਵਿੱਚ ਜਨਮੇ ਧਾਰਮਿਕ ਨੇਤਾ ਨੇ ਲਗਭਗ 20 ਸਾਲ ਪੇਰੂ ਵਿੱਚ ਮਿਸ਼ਨਰੀ ਵਜੋਂ ਸੇਵਾ ਕੀਤੀ ਅਤੇ ਬਾਅਦ ਵਿੱਚ ਨਾਗਰਿਕਤਾ ਹਾਸਲ ਕੀਤੀ। ਉਨ੍ਹਾਂ ਨੇ “ਲਿਓ XIV” ਨਾਮ ਧਾਰਨ ਕੀਤਾ। ਉਹਨਾਂ ਨੇ ਗਰੀਬਾਂ, ਪ੍ਰਵਾਸੀਆਂ ਅਤੇ ਵਾਤਾਵਰਣ ‘ਤੇ ਧਿਆਨ ਕੇਂਦਰਿਤ ਕੀਤਾ, ਪਰ ਸਮਲਿੰਗੀ ਵਿਆਹ ਵਰਗੇ ਮੁੱਦਿਆਂ 'ਤੇ ਰੂੜੀਵਾਦੀ ਪੱਖ ਨੂੰ ਵੀ ਬਰਕਰਾਰ ਰੱਖਿਆ ਹੈ। 

6. ਜਨਰੇਸ਼ਨ ਜ਼ੀ (Gen Z) ਦੇ ਅੰਦੋਲਨ

ਏਸ਼ੀਆ, ਅਫਰੀਕਾ ਅਤੇ ਲਾਤੀਨੀ ਅਮਰੀਕਾ ਵਿੱਚ 30 ਸਾਲ ਤੋਂ ਘੱਟ ਉਮਰ ਦੇ ਨੌਜਵਾਨਾਂ ਨੇ ਭ੍ਰਿਸ਼ਟਾਚਾਰ ਅਤੇ ਮਾੜੇ ਜੀਵਨ ਪੱਧਰ ਵਿਰੁੱਧ ਵੱਡੇ ਅੰਦੋਲਨ ਕੀਤੇ। ਇਨ੍ਹਾਂ ਨੂੰ ਮਿਲੀ-ਜੁਲੀ ਕਾਮਯਾਬੀ ਮਿਲੀ। ਮੋਰੱਕੋ ਵਿੱਚ ਸਰਕਾਰ ਨੇ ਸਮਾਜਿਕ ਸੁਧਾਰਾਂ ਦੇ ਵਾਅਦੇ ਕੀਤੇ, ਪਰ 2,000 ਤੋਂ ਵੱਧ ਪ੍ਰਦਰਸ਼ਨਕਾਰੀਆਂ ‘ਤੇ ਮਾਮਲੇ ਚੱਲ ਰਹੇ ਹਨ। ਕੁਝ ਹੋਰ ਦੇਸ਼ਾਂ ਵਿੱਚ ਹਿੰਸਕ ਦਬਾਅ ਕਾਰਨ ਇਹ ਪ੍ਰਦਰਸ਼ਨ ਸੱਤਾ ਵਿਰੋਧੀ ਵੱਡੀ ਚੁਣੌਤੀ ਬਣ ਗਏ। ਨੇਪਾਲ ਵਿੱਚ ਮਾਓਵਾਦੀ ਪ੍ਰਧਾਨ ਮੰਤਰੀ ਕੇ.ਪੀ. ਸ਼ਰਮਾ ਓਲੀ ਅਤੇ ਮੈਡਾਗਾਸਕਰ ਦੇ ਰਾਸ਼ਟਰਪਤੀ ਐਂਡਰੀ ਰਾਜੋਇਲੀਨਾ ਨੂੰ ਅਹੁਦੇ ਤੋਂ ਹਟਣਾ ਪਿਆ।

ਤਨਜ਼ਾਨੀਆ ਵਿੱਚ ਚੋਣਾਂ ਤੋਂ ਬਾਅਦ ਹੋਏ ਪ੍ਰਦਰਸ਼ਨਾਂ ਵਿੱਚ ਨੌਜਵਾਨਾਂ ਨੇ ਵੱਧ-ਚੜ੍ਹ ਕੇ ਹਿੱਸਾ ਲਿਆ, ਜਿਨ੍ਹਾਂ ਨੂੰ ਬੇਰਹਿਮੀ ਨਾਲ ਦਬਾ ਦਿੱਤਾ ਗਿਆ। ਜਾਪਾਨੀ ਕਾਮਿਕ (ਮਾਂਗਾ) 'ਵਨ ਪੀਸ' ਦਾ ਸਮੁੰਦਰੀ ਡਾਕੂਆਂ ਵਾਲਾ ਝੰਡਾ ਪ੍ਰਦਰਸ਼ਨਕਾਰੀਆਂ ਦਾ ਪ੍ਰਤੀਕ ਬਣ ਗਿਆ ਹੈ। ਸੋਸ਼ਲ ਮੀਡੀਆ ਰਾਹੀਂ ਇਹ ਨਿਸ਼ਾਨ ਹੁਣ ਦੁਨੀਆ ਭਰ ਵਿੱਚ ਜ਼ੁਲਮ ਵਿਰੁੱਧ ਲੜਾਈ ਦਾ ਪ੍ਰਤੀਕ ਬਣ ਚੁੱਕਾ ਹੈ।

7. ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) ਦਾ ਉਭਾਰ

ਤਕਨਾਲੋਜੀ ਦੀਆਂ ਵੱਡੀਆਂ ਕੰਪਨੀਆਂ ਨੇ AI ਦੇ ਵਿਕਾਸ ਲਈ ਅੰਨ੍ਹੇਵਾਹ ਪੈਸਾ ਖਰਚਿਆ ਹੈ। ਅਮਰੀਕੀ ਫਰਮ 'ਗਾਰਟਨਰ' ਅਨੁਸਾਰ 2025 ਵਿੱਚ AI 'ਤੇ ਖਰਚਾ 1.5 ਟ੍ਰਿਲੀਅਨ ਡਾਲਰ ਤੱਕ ਪਹੁੰਚਣ ਦੀ ਉਮੀਦ ਹੈ ਜਦਕਿ ਅਗਲੇ ਸਾਲ ਇਹ 2 ਟ੍ਰਿਲੀਅਨ ਡਾਲਰ ਤੱਕ ਪਹੁੰਚ ਸਕਦਾ ਹੈ। ਚਿੱਪ ਬਣਾਉਣ ਵਾਲੀ ਦਿੱਗਜ ਕੰਪਨੀ ਨਵੀਡੀਆ (Nvidia) ਦੀ ਮਾਰਕੀਟ ਕੀਮਤ 5 ਟ੍ਰਿਲੀਅਨ ਡਾਲਰ ਨੂੰ ਪਾਰ ਕਰ ਗਈ।

AI 'ਤੇ ਗਲਤ ਜਾਣਕਾਰੀ ਫੈਲਾਉਣ ਅਤੇ ਕਾਪੀਰਾਈਟ ਦੇ ਮੁਕੱਦਮੇ ਵੀ ਵਧ ਰਹੇ ਹਨ। ਕੈਲੀਫੋਰਨੀਆ ਵਿੱਚ ਇੱਕ ਨੌਜਵਾਨ ਦੀ ਖੁਦਕੁਸ਼ੀ ਤੋਂ ਬਾਅਦ OpenAI ਨੂੰ ਕਾਨੂੰਨੀ ਕਾਰਵਾਈ ਦਾ ਸਾਹਮਣਾ ਕਰਨਾ ਪਿਆ, ਜਿਸ ਵਿੱਚ ਦੋਸ਼ ਲਾਇਆ ਗਿਆ ਕਿ ChatGPT ਨੇ ਉਸ ਨੂੰ ਖੁਦਕੁਸ਼ੀ ਦੇ ਤਰੀਕੇ ਦੱਸੇ ਸਨ। 

8. ਲੂਵਰ ਮਿਊਜ਼ੀਅਮ ਵਿੱਚ ਹੈਰਾਨ ਕਰ ਦੇਣ ਵਾਲੀ ਚੋਰੀ

19 ਅਕਤੂਬਰ ਨੂੰ, ਮਜ਼ਦੂਰਾਂ ਦੀ ਵਰਦੀ ਵਿੱਚ ਆਏ ਚੋਰਾਂ ਨੇ ਪੈਰਿਸ ਦੇ ਮਸ਼ਹੂਰ ਲੂਵਰ ਅਜਾਇਬ ਘਰ ਵਿੱਚੋਂ 88 ਮਿਲੀਅਨ ਯੂਰੋ (ਲਗਭਗ 102 ਮਿਲੀਅਨ ਡਾਲਰ) ਦੇ ਸ਼ਾਹੀ ਗਹਿਣੇ ਚੋਰੀ ਕਰ ਲਏ। ਚੋਰ ਸਕੂਟਰਾਂ 'ਤੇ ਸਵਾਰ ਹੋ ਕੇ ਫਰਾਰ ਹੋ ਗਏ। ਹਾਲਾਂਕਿ ਤਿੰਨ ਸ਼ੱਕੀ ਫੜੇ ਗਏ ਹਨ, ਪਰ ਚੋਰੀ ਹੋਇਆ ਖਜ਼ਾਨਾ ਅਜੇ ਤੱਕ ਬਰਾਮਦ ਨਹੀਂ ਹੋਇਆ ਹੈ। ਇਸ ਘਟਨਾ ਨੇ ਦੁਨੀਆ ਦੇ ਸਭ ਤੋਂ ਵੱਧ ਦੇਖੇ ਜਾਣ ਵਾਲੇ ਅਜਾਇਬ ਘਰ ਦੀ ਸੁਰੱਖਿਆ 'ਤੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ। 

9. ਵੈਨੇਜ਼ੁਏਲਾ ਅਤੇ ਅਮਰੀਕੀ ਹਮਲੇ

ਅਮਰੀਕਾ ਨੇ ਨਸ਼ਾ ਤਸਕਰੀ ਵਿਰੁੱਧ ਕਾਰਵਾਈ ਦੇ ਨਾਮ 'ਤੇ ਲਾਤੀਨੀ ਅਮਰੀਕਾ ਦੇ ਤੱਟਾਂ 'ਤੇ ਆਪਣੀ ਫੌਜੀ ਤਾਇਨਾਤੀ ਵਧਾ ਦਿੱਤੀ ਹੈ। ਜਿਸ ਦਾ ਮਕਸਦ ਅਮਰੀਕਾ ਵੱਲ ਆ ਰਹੀ ਨਸ਼ਾ ਤਸਕਰੀ ਨੂੰ ਰੋਕਣਾ ਦੱਸਿਆ ਗਿਆ। ਪਿਛਲੇ ਕੁਝ ਹਫਤਿਆਂ ਵਿੱਚ ਅਮਰੀਕੀ ਹਮਲਿਆਂ ਵਿੱਚ ਦਰਜਨਾਂ ਲੋਕ ਮਾਰੇ ਗਏ ਹਨ। ਵੈਨੇਜ਼ੁਏਲਾ ਨੇ ਇਨ੍ਹਾਂ ਹਮਲਿਆਂ ਨੂੰ ਰਾਸ਼ਟਰਪਤੀ ਨਿਕੋਲਸ ਮਾਦੁਰੋ ਦੀ ਸਰਕਾਰ ਨੂੰ ਡੇਗਣ ਅਤੇ ਦੇਸ਼ ਦੇ ਤੇਲ ਭੰਡਾਰਾਂ 'ਤੇ ਕਬਜ਼ਾ ਕਰਨ ਦੀ ਸਾਜ਼ਿਸ਼ ਕਰਾਰ ਦਿੱਤਾ ਹੈ। ਅਮਰੀਕਾ ਨੇ ਮਾਦੁਰੋ ਦੀ ਗ੍ਰਿਫਤਾਰੀ ਲਈ 50 ਮਿਲੀਅਨ ਡਾਲਰ ਦੇ ਇਨਾਮ ਦੀ ਪੇਸ਼ਕਸ਼ ਕੀਤੀ ਹੈ। 

10. ਰਿਕਾਰਡ ਤੋੜ ਮੌਸਮੀ ਤਬਾਹੀ

ਵੀਅਤਨਾਮ ਵਿੱਚ ਘਾਤਕ ਹੜ੍ਹ ਆਏ, ਜਦਕਿ ਕੈਰੀਬੀਅਨ ਖੇਤਰ ਅਤੇ ਫਿਲੀਪੀਨਜ਼ ਵਿੱਚ ਸ਼ਕਤੀਸ਼ਾਲੀ ਤੂਫ਼ਾਨਾਂ ਨੇ ਭਾਰੀ ਨੁਕਸਾਨ ਕੀਤਾ। ਵਿਗਿਆਨੀਆਂ ਮੁਤਾਬਕ, ਮਨੁੱਖੀ ਗਤੀਵਿਧੀਆਂ ਨਾਲ ਹੋ ਰਹੀ ਮੌਸਮੀ ਤਬਦੀਲੀ ਕਾਰਨ ਮੌਸਮੀ ਘਟਨਾਵਾਂ ਹੋਰ ਵੱਧ ਖ਼ਤਰਨਾਕ ਅਤੇ ਹੋਰ ਤਬਾਹੀ ਵਾਲੀਆਂ ਬਣ ਰਹੀਆਂ ਹਨ। ਯੂਰਪ ਵਿੱਚ ਤਾਪਮਾਨ ਰਿਕਾਰਡ ਪੱਧਰ ਤੱਕ ਪਹੁੰਚ ਗਿਆ ਅਤੇ ਗਰਮੀ ਦੌਰਾਨ ਜੰਗਲੀ ਅੱਗ ਨਾਲ ਸੜੀ ਜ਼ਮੀਨ ਦਾ ਖੇਤਰ ਇਤਿਹਾਸਕ ਰਿਕਾਰਡ ਬਣ ਗਿਆ। 

ਫਰਾਂਸ ਦੇ ਮੈਡੀਟੇਰੇਨੀਅਨ ਤਟ ਨੇ ਪਿਛਲੇ 50 ਸਾਲਾਂ ਦੀ ਸਭ ਤੋਂ ਭਿਆਨਕ ਅੱਗ ਦੇਖੀ। ਅਮਰੀਕਾ ਵਿੱਚ ਵੀ ਬਿਜਲੀ ਡਿੱਗਣ ਕਾਰਨ ਲੱਗੀ ਅੱਗ ਕਾਰਨ 'ਗ੍ਰੈਂਡ ਕੈਨਿਯਨ' ਦੇ ਉੱਤਰੀ ਹਿੱਸੇ ਨੂੰ ਸੈਲਾਨੀਆਂ ਲਈ ਬੰਦ ਕਰਨਾ ਪਿਆ।