ADVERTISEMENT
ADVERTISEMENT
ਓਵਲ ਆਫਿਸ ‘ਚ ਟਰੰਪ ਤੇ ਮਰਜ਼ ਦੀ ਮੁਲਾਕਾਤ, ਈਰਾਨ ਦੀ 'ਤਬਾਹੀ' ਬਣਿਆ ਮੁੱਦਾ
ਟਰੰਪ ਨੇ ਈਰਾਨ 'ਤੇ ਨਾਗਰਿਕਾਂ ਅਤੇ ਗੁਆਂਢੀ ਰਾਜਾਂ ਨੂੰ ਨਿਸ਼ਾਨਾ ਬਣਾਉਣ ਦਾ ਦੋਸ਼ ਲਗਾਇਆ
-
ਆਈਏਐਨਐਸ - Wed, 04, Mar 2026
- 13:55 EST
- 0
ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ 3 ਮਾਰਚ ਨੂੰ ਓਵਲ ਆਫਿਸ ਵਿੱਚ ਜਰਮਨ ਚਾਂਸਲਰ ਫਰੀਡਰਿਕ ਮਰਜ਼ ਦਾ ਸਵਾਗਤ ਕੀਤਾ। ਉਨ੍ਹਾਂ ਨੇ ਈਰਾਨ ਵਿਰੁੱਧ ਅਮਰੀਕਾ ਦੀ ਅਗਵਾਈ ਵਾਲੀ ਮੁਹਿੰਮ ਨੂੰ ਨਿਰਣਾਇਕ ਅਤੇ ਜ਼ੋਰਦਾਰ ਦੱਸਦਿਆਂ ਕਿਹਾ ਕਿ ਤੇਹਰਾਨ ਦਾ ਫੌਜੀ ਢਾਂਚਾ "ਤਬਾਹ" ਹੋ ਚੁੱਕਾ ਹੈ ਅਤੇ ਚੇਤਾਵਨੀ ਦਿੱਤੀ ਕਿ ਈਰਾਨ ਦੀ ਲੀਡਰਸ਼ਿਪ ਨੂੰ "ਬਹੁਤ ਜ਼ਿਆਦਾ ਨੁਕਸਾਨ" ਦਾ ਸਾਹਮਣਾ ਕਰਨਾ ਪਵੇਗਾ।
ਉਪ-ਰਾਸ਼ਟਰਪਤੀ ਜੇ.ਡੀ. ਵੈਂਸ, ਵਿਦੇਸ਼ ਮੰਤਰੀ ਮਾਰਕੋ ਰੂਬੀਓ ਅਤੇ ਸੀਨੀਅਰ ਕੈਬਨਿਟ ਅਧਿਕਾਰੀਆਂ ਦੇ ਨਾਲ ਬੈਠੇ ਟਰੰਪ ਨੇ ਮਰਜ਼ ਦੀ ਪ੍ਰਸ਼ੰਸਾ ਕਰਦੇ ਹੋਏ ਉਨ੍ਹਾਂ ਨੂੰ ਇੱਕ "ਬਹੁਤ ਸਫਲ ਵਿਅਕਤੀ" ਦੱਸਿਆ ਜੋ "ਬਹੁਤ ਵਧੀਆ ਕੰਮ ਕਰ ਰਹੇ ਹਨ। ਨਾਲ ਹੀ ਉਨ੍ਹਾਂ ਕਿਹਾ ਕਿ ਦੋਵੇਂ ਆਗੂ ਵਪਾਰ, ਯੂਕਰੇਨ ਅਤੇ ਈਰਾਨ ਦੇ ਮੁੱਦਿਆਂ 'ਤੇ ਚਰਚਾ ਕਰਨਗੇ।
ਈਰਾਨ ਦੇ ਮੁੱਦੇ 'ਤੇ ਟਰੰਪ ਨੇ ਇੱਕ ਵੱਡੇ ਫੌਜੀ ਹਮਲੇ ਦਾ ਜ਼ਿਕਰ ਕੀਤਾ। ਉਨ੍ਹਾਂ ਕਿਹਾ, "ਉਨ੍ਹਾਂ ਕੋਲ ਕੋਈ ਜਲ ਸੈਨਾ ਨਹੀਂ ਹੈ; ਉਹ ਤਬਾਹ ਹੋ ਚੁੱਕੀ ਹੈ। ਉਨ੍ਹਾਂ ਕੋਲ ਕੋਈ ਹਵਾਈ ਸੈਨਾ ਨਹੀਂ ਹੈ; ਉਹ ਵੀ ਖ਼ਤਮ ਹੋ ਗਈ ਹੈ। ਉਨ੍ਹਾਂ ਕੋਲ ਕੋਈ ਹਵਾਈ ਨਿਗਰਾਨੀ ਨਹੀਂ ਹੈ; ਉਹ ਵੀ ਤਬਾਹ ਹੋ ਗਈ ਹੈ। ਉਨ੍ਹਾਂ ਦੇ ਰਾਡਾਰ ਸਿਸਟਮ ਖ਼ਤਮ ਕਰ ਦਿੱਤੇ ਗਏ ਹਨ। ਸਾਡੀ ਫੌਜ ਬਹੁਤ ਮਹਾਨ ਹੈ ਅਤੇ ਉਹ ਸ਼ਾਨਦਾਰ ਕੰਮ ਕਰ ਰਹੀ ਹੈ।"
ਮਰਜ਼ ਨੇ ਵੀ ਤੇਹਰਾਨ ਦੇ ਮੁੱਦੇ 'ਤੇ ਸਹਿਮਤੀ ਜਤਾਈ। ਉਨ੍ਹਾਂ ਕਿਹਾ, "ਤੇਹਰਾਨ ਦੀ ਇਸ ਭਿਆਨਕ ਹਕੂਮਤ ਨੂੰ ਖਤਮ ਕਰਨ ਦੇ ਮਾਮਲੇ ਵਿੱਚ ਅਸੀਂ ਇੱਕੋ ਰਾਏ ਰੱਖਦੇ ਹਾਂ।" ਉਨ੍ਹਾਂ ਅੱਗੇ ਕਿਹਾ ਕਿ ਦੋਵੇਂ ਆਗੂ "ਅਗਲੇ ਦਿਨ" ਬਾਰੇ ਚਰਚਾ ਕਰਨਗੇ ਕਿ ਜੇਕਰ ਉਹ ਸੱਤਾ ਤੋਂ ਬਾਹਰ ਹੋ ਜਾਂਦੇ ਹਨ ਤਾਂ ਉਸ ਤੋਂ ਬਾਅਦ ਕੀ ਹੋਵੇਗਾ।
ਜਦੋਂ ਇਹ ਪੁੱਛਿਆ ਗਿਆ ਕਿ ਕੀ ਇਜ਼ਰਾਈਲ ਨੇ ਵਾਸ਼ਿੰਗਟਨ ਨੂੰ ਕਾਰਵਾਈ ਕਰਨ ਲਈ ਮਜਬੂਰ ਕੀਤਾ ਸੀ, ਤਾਂ ਟਰੰਪ ਨੇ ਜਵਾਬ ਦਿੱਤਾ, "ਨਹੀਂ, ਸ਼ਾਇਦ ਮੈਂ ਹੀ ਉਨ੍ਹਾਂ ਨੂੰ ਕਾਰਵਾਈ ਲਈ ਮਜਬੂਰ ਕੀਤਾ ਹੋਵੇ।" ਉਨ੍ਹਾਂ ਕਿਹਾ, "ਮੇਰੀ ਰਾਏ ਸੀ ਕਿ ਉਹ ਪਹਿਲਾਂ ਹਮਲਾ ਕਰਨ ਜਾ ਰਹੇ ਸਨ।"
ਟਰੰਪ ਨੇ ਈਰਾਨ 'ਤੇ ਆਮ ਨਾਗਰਿਕਾਂ ਅਤੇ ਗੁਆਂਢੀ ਦੇਸ਼ਾਂ ਨੂੰ ਨਿਸ਼ਾਨਾ ਬਣਾਉਣ ਦਾ ਦੋਸ਼ ਲਗਾਇਆ। ਉਨ੍ਹਾਂ ਕਿਹਾ, "ਉਨ੍ਹਾਂ ਨੇ ਉਨ੍ਹਾਂ ਦੇਸ਼ਾਂ 'ਤੇ ਹਮਲੇ ਕੀਤੇ ਜਿਨ੍ਹਾਂ ਦਾ ਇਸ ਸਭ ਨਾਲ ਕੋਈ ਲੈਣਾ-ਦੇਣਾ ਨਹੀਂ ਸੀ," ਅਤੇ ਇਸ ਨੂੰ "ਉਸ ਬੁਰਾਈ ਦਾ ਸਬੂਤ ਦੱਸਿਆ ਜਿਸ ਨਾਲ ਅਸੀਂ ਨਜਿੱਠ ਰਹੇ ਹਾਂ।"
ਟਰੰਪ ਨੇ ਦਾਅਵਾ ਕੀਤਾ ਕਿ ਪਿਛਲੇ ਤਿੰਨ ਹਫ਼ਤਿਆਂ ਵਿੱਚ "35,000 ਪ੍ਰਦਰਸ਼ਨਕਾਰੀ ਹਿੰਸਕ ਤੌਰ 'ਤੇ ਮਾਰੇ ਗਏ ਹਨ" ਅਤੇ ਲੀਡਰਸ਼ਿਪ ਨੂੰ ਭਾਰੀ ਨੁਕਸਾਨ ਪਹੁੰਚਾਇਆ ਗਿਆ ਹੈ। ਉਨ੍ਹਾਂ ਕਿਹਾ, "ਪਹਿਲੇ ਹਮਲੇ ਵਿੱਚ 49 ਲੋਕ ਮਾਰੇ ਗਏ ਸਨ। ਅਤੇ ਮੇਰਾ ਖਿਆਲ ਹੈ ਕਿ ਅੱਜ ਨਵੀਂ ਲੀਡਰਸ਼ਿਪ 'ਤੇ ਇੱਕ ਹੋਰ ਹਮਲਾ ਹੋਇਆ ਹੈ।"
ਯੂਕਰੇਨ ਬਾਰੇ ਮਰਜ਼ ਨੇ ਕਿਹਾ, "ਅਸੀਂ ਸਾਰੇ ਚਾਹੁੰਦੇ ਹਾਂ ਕਿ ਇਹ ਜੰਗ ਜਿੰਨੀ ਜਲਦੀ ਹੋ ਸਕੇ ਖਤਮ ਹੋਵੇ। ਪਰ ਯੂਕਰੇਨ ਨੂੰ ਆਪਣੇ ਖੇਤਰ ਅਤੇ ਆਪਣੇ ਸੁਰੱਖਿਆ ਹਿੱਤਾਂ ਦੀ ਰਾਖੀ ਕਰਨੀ ਹੋਵੇਗੀ।" ਟਰੰਪ ਨੇ ਕਿਹਾ ਕਿ ਉਸ ਮੂਰਖਤਾ ਭਰੀ ਜੰਗ ਵਿੱਚ 32,000 ਸਿਪਾਹੀ ਮਾਰੇ ਗਏ ਅਤੇ ਨਾਲ ਹੀ ਕਿਹਾ ਕਿ ਤਾੜੀ ਦੋਵਾਂ ਹੱਥਾਂ ਨਾਲ ਵੱਜਦੀ ਹੈ।
ਜਰਮਨੀ ਯੂਰਪ ਵਿੱਚ ਵਾਸ਼ਿੰਗਟਨ ਦੇ ਮੁੱਖ ਸਹਿਯੋਗੀਆਂ ਵਿੱਚੋਂ ਇੱਕ ਹੈ ਅਤੇ ਨਾਟੋ ਤੇ ਯੂਰਪੀਅਨ ਯੂਨੀਅਨ ਦੀ ਨੀਤੀ ਘੜਨ ਵਿੱਚ ਇੱਕ ਕੇਂਦਰੀ ਭੂਮਿਕਾ ਨਿਭਾਉਂਦਾ ਹੈ। ਰੂਸ ਦੇ 2022 ਦੇ ਹਮਲੇ ਤੋਂ ਬਾਅਦ ਬਰਲਿਨ ਨੇ ਯੂਕਰੇਨ ਦੀ ਸਹਾਇਤਾ ਅਤੇ ਪਾਬੰਦੀਆਂ ਦੀ ਨੀਤੀ 'ਤੇ ਅਮਰੀਕਾ ਨਾਲ ਮਿਲ ਕੇ ਕੰਮ ਕੀਤਾ ਹੈ।
Related
ADVERTISEMENT
ADVERTISEMENT
E Paper
Video
Comments
Start the conversation
Become a member of New India Abroad to start commenting.
Sign Up Now
Already have an account? Login