ADVERTISEMENT
ADVERTISEMENT
રાજા કૃષ્ણમૂર્તિએ USPS પ્રમુખને હટાવવાની માંગ કરી
ટ્રમ્પના ચૂંટણી મેલ સંબંધિત આદેશ પર કેસ ચાલી રહ્યો હોવા છતાં USPSએ કાર્યવાહી કરી હોવાનો આરોપ.
-
17494975061757083828.png)
માલવિકા ચૌધરી - Tue, 04, Aug 2026
- 03:20 EDT
- 18
કોંગ્રેસમેન રાજા કૃષ્ણમૂર્તિ / IANS
અમેરિકાના કોંગ્રેસમેન રાજા કૃષ્ણમૂર્તિએ યુનાઇટેડ સ્ટેટ્સ પોસ્ટલ સર્વિસ (USPS)ના પોસ્ટમાસ્ટર જનરલ ડેવિડ સ્ટાઇનરને પદ પરથી હટાવવાની માંગ કરી છે. તેમણે આરોપ લગાવ્યો છે કે USPSએ રાષ્ટ્રપતિ ડોનાલ્ડ ટ્રમ્પના ચૂંટણી મેલ સંબંધિત એક્ઝિક્યુટિવ ઓર્ડરને અમલમાં મૂકવાનો પ્રયાસ કર્યો છે.
3 ઓગસ્ટે USPS બોર્ડ ઓફ ગવર્નર્સને લખેલા પત્રમાં, હાઉસ કમિટી ઑન ઓવરસાઇટ એન્ડ ગવર્નમેન્ટ રિફોર્મના સભ્ય કૃષ્ણમૂર્તિએ જણાવ્યું કે સ્ટાઇનરે USPSનો ઉપયોગ એવા એક્ઝિક્યુટિવ ઓર્ડરના અમલ માટે કર્યો, જેને ફેડરલ અદાલતોએ બે વખત બંધારણ વિરુદ્ધ ગણાવ્યો છે. તેમણે કેસ હજુ ચાલુ હોવા છતાં USPS દ્વારા કરવામાં આવેલી કાર્યવાહી અંગે વિગતવાર માહિતી પણ માંગી છે.
કૃષ્ણમૂર્તિએ પોતાના પત્રમાં લખ્યું કે, "તમારા નેતૃત્વ હેઠળ યુનાઇટેડ સ્ટેટ્સ પોસ્ટલ સર્વિસ મતદારોને દબાવવાના પક્ષપાતી સાધનમાં બદલાઈ ગઈ છે. બે સદીથી વધુ સમયથી રાજકીય પક્ષપાત વિના લોકો સુધી ટપાલ પહોંચાડતી આ સંસ્થાનો ઉપયોગ હવે એવા એક્ઝિક્યુટિવ ઓર્ડરના અમલ માટે થઈ રહ્યો છે, જેને ફેડરલ અદાલતોએ બે વખત બંધારણ વિરુદ્ધ ગણાવ્યો છે."
31 માર્ચે ટ્રમ્પે બહાર પાડેલા એક્ઝિક્યુટિવ ઓર્ડરમાં USPSને એવા મતદારોના મેઇલ-ઇન બેલેટ પહોંચાડવાનું અટકાવવા સૂચના આપવામાં આવી હતી, જેમની મતદાન માટેની પાત્રતા ફેડરલ સ્તરે તૈયાર કરાયેલી મતદાર યાદી સામે ચકાસી શકાતી ન હોય.
આ આદેશને 23 રાજ્યઓ અને ડિસ્ટ્રિક્ટ ઓફ કોલંબિયાએ પડકાર્યો હતો. તેમનો દાવો હતો કે આ આદેશ રાજ્ય સરકારો અને કોંગ્રેસને મળેલા અધિકારોમાં હસ્તક્ષેપ કરે છે.
ફેડરલ જિલ્લા અદાલતે આ આદેશની મહત્વપૂર્ણ જોગવાઈઓ પર રોક લગાવી હતી. ત્યારબાદ 25 જુલાઈએ યુ.એસ. કોર્ટ ઓફ એપિલ્સ ફોર ધ ફર્સ્ટ સર્કિટે પણ આ રોક યથાવત રાખી હતી. જોકે, ટ્રમ્પ પ્રશાસને નવેમ્બરમાં યોજાનારી મધ્યાવધિ ચૂંટણી પહેલાં આ આદેશ અમલમાં મૂકવાની મંજૂરી આપવા માટે હવે યુ.એસ. સુપ્રીમ કોર્ટનો સંપર્ક કર્યો છે.
ઇલિનોઇસના ડેમોક્રેટ નેતા કૃષ્ણમૂર્તિએ દલીલ કરી કે સુપ્રીમ કોર્ટ સમક્ષ ટ્રમ્પ પ્રશાસને રજૂ કરેલું વલણ અને USPS દ્વારા કરવામાં આવી રહેલી કાર્યવાહી વચ્ચે સ્પષ્ટ વિરોધાભાસ જોવા મળે છે.
તેમણે લખ્યું કે, "સુપ્રીમ કોર્ટ સમક્ષ ટ્રમ્પ પ્રશાસને દલીલ કરી છે કે આ એક્ઝિક્યુટિવ ઓર્ડર માત્ર સામાન્ય નીતિ માર્ગદર્શન છે અને USPSએ હજુ સુધી તેના અમલ માટે અંતિમ નિયમો તૈયાર કર્યા નથી. પરંતુ છેલ્લા ચાર મહિનાથી USPS દ્વારા કરવામાં આવી રહેલી કામગીરી કંઈક જુદી જ હકીકત દર્શાવે છે."
કૃષ્ણમૂર્તિએ સ્ટાઇનર પર કોંગ્રેસની દેખરેખ પ્રક્રિયામાં સહકાર ન આપવાનો પણ આરોપ લગાવ્યો. તેમણે જણાવ્યું કે પોસ્ટમાસ્ટર જનરલે વારંવાર માંગવામાં આવેલી માહિતી આપી નહોતી, સેનેટમાં આપેલી સાક્ષી દરમિયાન કેસ ચાલુ હોવા છતાં આદેશના મુખ્ય ભાગો અમલમાં મૂકવાની ઇચ્છા વ્યક્ત કરી હતી, ત્યારબાદ લેખિત પ્રશ્નોના જવાબ આપવાનો ઇનકાર કર્યો હતો અને હાઉસ કમિટી ઑન ઓવરસાઇટ એન્ડ ગવર્નમેન્ટ રિફોર્મ સમક્ષ હાજર થવાનું પણ ટાળ્યું હતું.
કૃષ્ણમૂર્તિએ પોતાના પત્રમાં લખ્યું, "જે પોસ્ટમાસ્ટર જનરલ કોંગ્રેસને એ પણ જણાવી શકતા નથી કે તેમની એજન્સી ફેડરલ અદાલતના આદેશનું પાલન કરી રહી છે કે નહીં, અને જે આ અંગે જવાબ આપવા કોંગ્રેસ સમક્ષ હાજર થવા પણ તૈયાર નથી, તેમણે આ પદ માટે જરૂરી વિશ્વાસ પહેલેથી જ ગુમાવી દીધો છે. તેથી હું પોસ્ટલ સર્વિસ બોર્ડ ઓફ ગવર્નર્સને તેમને પદ પરથી હટાવવાની માંગ કરું છું અને મારી કમિટીના અન્ય સભ્યોને પણ આ માંગમાં જોડાવા અપીલ કરીશ."
કૃષ્ણમૂર્તિએ 13 ઓગસ્ટ સુધીમાં જવાબ આપવા જણાવ્યું છે. તેમણે USPS દ્વારા આ આદેશના અમલ માટે કરવામાં આવેલી તમામ કાર્યવાહી, પોસ્ટલ કર્મચારીઓને આપવામાં આવેલા માર્ગદર્શનો, ચૂંટણી અધિકારીઓ સાથે થયેલા સંચાર અને ફેડરલ અદાલતના રોકના આદેશ બાદ કરવામાં આવેલા ફેરફારો અંગે વિગતવાર માહિતી માંગવામાં આવી છે.
ગુજરાતીમાં અન્ય સમાચારો વાંચવા અહીં ક્લિક કરો "ન્યુ ઇન્ડિયા અબ્રોડ ગુજરાતી"
Leave A Comment
Related
ADVERTISEMENT
ADVERTISEMENT
E Paper
Video
Comments
Start the conversation
Become a member of New India Abroad to start commenting.
Sign Up Now
Already have an account? Login