ADVERTISEMENT
ADVERTISEMENT
પાસપોર્ટ બદલ્યા પછી હવે નવી OCI કાર્ડ લેવાની જરૂર નહીં
પાસપોર્ટ, વ્યક્તિગત વિગતો અને બાયોમેટ્રિક અપડેટ હવે સંપૂર્ણપણે ઓનલાઈન થશે.
-
અંકિતા બૈદ્ય - Wed, 08, Jul 2026
- 04:38 EDT
- 122
પ્રતીકાત્મક તસ્વીર / UNSPLASH
વિદેશમાં રહેતા ભારતીય મૂળના લોકો માટે હવે ઓવરસીઝ સિટિઝન ઓફ ઇન્ડિયા (OCI) કાર્ડ અપડેટ કરાવવાની પ્રક્રિયા વધુ સરળ બની છે. ભારત સરકારના બ્યુરો ઓફ ઇમિગ્રેશન (BOI) અનુસાર, હવે નવો પાસપોર્ટ મળ્યા બાદ અથવા વ્યક્તિગત વિગતોમાં ફેરફાર થયા પછી નવી ફિઝિકલ OCI કાર્ડ માટે અરજી કરવાની જરૂર રહેશે નહીં. સમગ્ર પ્રક્રિયા હવે ઓનલાઈન પૂર્ણ કરી શકાશે.
બ્યુરો ઓફ ઇમિગ્રેશને સોશિયલ મીડિયા પ્લેટફોર્મ X પર જણાવ્યું કે, 20 અથવા 50 વર્ષની ઉંમર બાદ નવો પાસપોર્ટ મેળવનારા OCI કાર્ડધારકો અથવા નામ, નાગરિકતા કે લિંગ જેવી વ્યક્તિગત વિગતોમાં ફેરફાર કરનારાઓ OCI સર્વિસિસ પોર્ટલ દ્વારા જરૂરી માહિતી અપડેટ કરી શકશે અને ત્યારબાદ અપડેટ થયેલું ઇલેક્ટ્રોનિક OCI (e-OCI) કાર્ડ ડાઉનલોડ કરી શકશે.
આ માટે અરજદારે ociservices.gov.in પર જઈ "Online Registration" અને ત્યારબાદ "OCI Miscellaneous Services" પસંદ કરવું પડશે. ત્યારબાદ અગાઉ OCI સાથે જોડાયેલા પાસપોર્ટ નંબર, OCI કાર્ડ નંબર અને જન્મતારીખની મદદથી પોતાના પ્રોફાઇલમાં લોગિન કરવું પડશે.
લોગિન કર્યા પછી અરજદાર પાસપોર્ટની વિગતો અપડેટ કરવી, વ્યક્તિગત વિગતો અપડેટ કરવી અથવા સરનામું અને વ્યવસાય સંબંધિત માહિતી અપડેટ કરવાની સેવા પસંદ કરી શકશે. જરૂરી દસ્તાવેજો અપલોડ કર્યા બાદ અરજી સંબંધિત ભારતીય મિશન અથવા ફોરેનર્સ રિજનલ રજિસ્ટ્રેશન ઓફિસ (FRRO) દ્વારા તપાસવામાં આવશે. મંજૂરી મળ્યા પછી અપડેટ થયેલું e-OCI કાર્ડ અરજદાર પોતાના ડેશબોર્ડ પરથી ડાઉનલોડ કરી શકશે.
બ્યુરો ઓફ ઇમિગ્રેશને વધુમાં જણાવ્યું કે, 20 વર્ષની ઉંમર પૂર્ણ થયા પછી નવો પાસપોર્ટ મેળવનારા OCI કાર્ડધારકોએ પાસપોર્ટની વિગતો અપડેટ કરવાની સાથે પોતાના બાયોમેટ્રિક્સ પણ સંબંધિત ભારતીય મિશન, FRRO કચેરી અથવા આગામી આંતરરાષ્ટ્રીય પ્રવાસ દરમિયાન એરપોર્ટ પર અપડેટ કરાવવા પડશે.
નવો પાસપોર્ટ મળ્યાના 90 દિવસની અંદર પાસપોર્ટની વિગતો અપડેટ કરવી ફરજિયાત રહેશે. જો આ સમયમર્યાદામાં અપડેટ નહીં કરવામાં આવે તો 25 ડોલરનો વિલંબ દંડ ચૂકવવો પડશે.
આ નવી પ્રક્રિયા ગૃહ મંત્રાલય દ્વારા જાહેર કરાયેલા નાગરિકતા (સંશોધન) નિયમો, 2026 હેઠળ અમલમાં આવી છે. સુધારાયેલા નિયમો મુજબ હવે OCI કાર્ડ માટેની નોંધણી તેમજ OCIનો ત્યાગ (Renunciation) સંબંધિત તમામ અરજીઓ સત્તાવાર OCI પોર્ટલ મારફતે ઓનલાઈન જ કરવી પડશે.
ગૃહ મંત્રાલયે એ પણ સ્પષ્ટ કર્યું છે કે કોઈ સગીર બાળક એકસાથે ભારતીય પાસપોર્ટ અને અન્ય દેશનો પાસપોર્ટ બંને રાખી શકશે નહીં.
વિદેશ મંત્રાલયના જણાવ્યા મુજબ, OCI યોજના વર્ષ 2005માં નાગરિકતા અધિનિયમ, 1955માં સુધારા બાદ શરૂ કરવામાં આવી હતી. આ યોજના એવા ભારતીય મૂળના લોકોને OCI તરીકે નોંધણી કરવાની સુવિધા આપે છે, જેઓ 26 જાન્યુઆરી, 1950ના રોજ અથવા ત્યારબાદ ભારતના નાગરિક હતા અથવા તે તારીખે ભારતીય નાગરિક બનવા માટે પાત્ર હતા.
જો કે, પાકિસ્તાન અથવા બાંગ્લાદેશના હાલના અથવા ભૂતપૂર્વ નાગરિકો માટે OCI યોજના ઉપલબ્ધ નથી.
OCI કાર્ડધારકોને ભારત માટે આજીવન બહુપ્રવેશ (Multiple Entry) અને બહુહેતુક વિઝાની સુવિધા મળે છે. ઉપરાંત, તેમને અનેક આર્થિક, નાણાકીય અને શૈક્ષણિક ક્ષેત્રોમાં એનઆરઆઈ સમાન સુવિધાઓ પણ મળે છે. જોકે, OCI કાર્ડધારકોને મતદાનનો અધિકાર મળતો નથી તેમજ તેઓ ભારતીય નાગરિકો માટે અનામત સરકારી હોદ્દા અથવા જાહેર પદ પર નિયુક્ત થઈ શકતા નથી.
સરકારનું કહેવું છે કે આ નવા નિયમોથી વિશ્વભરના લાખો OCI કાર્ડધારકો માટે પ્રક્રિયા વધુ સરળ બનશે. વારંવાર નવી ફિઝિકલ OCI કાર્ડ મેળવવાની જરૂરિયાત હવે સમાપ્ત થશે અને જરૂરી ચકાસણી ભારતીય મિશન તથા FRRO મારફતે જાળવી રાખીને સમગ્ર પ્રક્રિયા ડિજિટલ રીતે પૂર્ણ કરી શકાશે.
ગુજરાતીમાં અન્ય સમાચારો વાંચવા અહીં ક્લિક કરો "ન્યુ ઇન્ડિયા અબ્રોડ ગુજરાતી"
Leave A Comment
Related
.png)
ADVERTISEMENT
ADVERTISEMENT
E Paper
Video
Comments
Start the conversation
Become a member of New India Abroad to start commenting.
Sign Up Now
Already have an account? Login