ADVERTISEMENT
ADVERTISEMENT
મણિકંદન પાંડિયનને ગ્લોબલ બાયોફ્યુઅલ ચેમ્પિયન ફેલોશિપ
પાંડિયનને 15,000 ડોલરનું ફંડિંગ મળશે, ઉપરાંત તેઓ ઉદ્યોગના નિષ્ણાતો સાથે કામ કરી વૈશ્વિક બાયોફ્યુઅલ નેટવર્કનો ભાગ બનશે.
-
સંવાદદાતા - Tue, 02, Jun 2026
- 09:19 EDT
- 29
મણિકંદન પાંડિયન / Manikandan Pandiyan via LinkedIn
ભારતીય મૂળના અમેરિકન એન્જિનિયર અને યુનિવર્સિટી ઓફ મિશિગનના મિકેનિકલ એન્જિનિયરિંગમાં પીએચડી અભ્યાસ કરતા મણિકંદન પાંડિયનને ગ્લોબલ બાયોફ્યુઅલ એલાયન્સ દ્વારા 'ગ્લોબલ બાયોફ્યુઅલ ચેમ્પિયન ફેલો' તરીકે પસંદ કરવામાં આવ્યા છે.
વિશ્વભરની વિવિધ સંસ્થાઓમાંથી પસંદ કરાયેલા 15 ફેલોમાં પાંડિયનનો સમાવેશ થયો છે. તેમની પસંદગી "ReACT-HTL" નામના પ્રોજેક્ટ માટે કરવામાં આવી છે, જેમાં એરિકા કેટેચુ (સુપારી)ના બાયોમાસ કચરાને હાઇડ્રોથર્મલ લિક્વિફેક્શન ટેક્નોલોજી દ્વારા બાયોફ્યુઅલમાં રૂપાંતરિત કરવાની સંભાવનાઓનો અભ્યાસ કરવામાં આવશે.
ગ્લોબલ બાયોફ્યુઅલ એલાયન્સની ગ્લોબલ બાયોફ્યુઅલ ચેમ્પિયન ફેલોશિપ (GBCF)નો હેતુ બાયોફ્યુઅલ ક્ષેત્રમાં યુવા નેતાઓને પ્રોત્સાહન આપવાનો અને ઉદ્યોગના મહત્વના પડકારોને ઉકેલવા માટેના સંશોધનને ટેકો આપવાનો છે.
આ સન્માન અંગે પાંડિયને જણાવ્યું હતું કે, "ગ્લોબલ બાયોફ્યુઅલ ચેમ્પિયન ફેલોશિપ પ્રાપ્ત કરવી મારા માટે વ્યક્તિગત અને વ્યાવસાયિક રીતે એક મહત્વપૂર્ણ સિદ્ધિ છે."
તેમણે ઉમેર્યું કે, "ભારતના ગ્રામ્ય વિસ્તારમાં ખેડૂત પરિવારમાંથી આવવાને કારણે મેં કૃષિ કચરાના સંચાલન અને ટકાઉ સંસાધન ઉપયોગ સાથે જોડાયેલા પડકારોને નજીકથી જોયા છે. આ ફેલોશિપ મને મારા વ્યક્તિગત અનુભવોને એન્જિનિયરિંગ અને સંશોધનના લક્ષ્યો સાથે જોડવાની તક આપે છે."
તેમના પ્રસ્તાવનો ઉદ્દેશ એરિકા કેટેચુની ખેતીમાંથી ઉત્પન્ન થતા કૃષિ કચરાને હાઇડ્રોથર્મલ લિક્વિફેક્શન પ્રક્રિયા દ્વારા નવીનીકરણીય ઊર્જા ઉત્પાદનોમાં પરિવર્તિત કરવાનો છે, જે સ્વચ્છ ઇંધણ ઉત્પાદન અને પર્યાવરણને અનુકૂળ કચરા વ્યવસ્થાપનને પ્રોત્સાહન આપશે.
પાંડિયને જણાવ્યું કે, "સુપારીની ખેતી દક્ષિણ અને દક્ષિણ-પૂર્વ એશિયામાં, ખાસ કરીને ભારતમાં, મોટા પ્રમાણમાં થાય છે. જેના કારણે છાલ, પાંદડાના આવરણ, ડાળીઓ અને પાંદડાં જેવા મોટા પ્રમાણમાં કૃષિ અવશેષો ઉત્પન્ન થાય છે."
તેમણે વધુમાં કહ્યું કે, "આ કચરાનો મોટો ભાગ હાલમાં સળગાવી દેવામાં આવે છે અથવા ફેંકી દેવામાં આવે છે, જેના કારણે પર્યાવરણીય પ્રદૂષણ અને ગ્રીનહાઉસ ગેસના ઉત્સર્જનમાં વધારો થાય છે."
એક વર્ષીય ફેલોશિપ દરમિયાન પાંડિયનને 15,000 ડોલરનું ફંડિંગ મળશે. ઉપરાંત તેઓ બાયોફ્યુઅલ ઉદ્યોગના નિષ્ણાતો સાથે સહયોગ કરશે અને વૈશ્વિક સ્તરે વ્યાવસાયિક નેટવર્ક વિકસાવશે.
તેમણે જણાવ્યું કે, "હું કાર્બન ન્યુટ્રાલિટી એક્સેલરેશન પ્રોગ્રામ, યુ-એમ ગ્રેહામ સસ્ટેનેબિલિટી ઇન્સ્ટિટ્યૂટ અને યુનિવર્સિટી ઓફ મિશિગનના મિકેનિકલ એન્જિનિયરિંગ વિભાગનો તેમના સહયોગ માટે દિલથી આભાર માનું છું."
પાંડિયને તેમના માર્ગદર્શક અને મિકેનિકલ એન્જિનિયરિંગના આર્થર એફ. થર્નાઉ પ્રોફેસર માર્ગારેટ વૂલડ્રિજ તેમજ એડમ મેઇલ અને ક્રિસ ઓવેન્સનો પણ પ્રસ્તાવ રજૂ કરવાની પ્રક્રિયામાં મળેલા માર્ગદર્શન અને સહાય માટે આભાર વ્યક્ત કર્યો.
મણિકંદન પાંડિયને અગાઉ યુનિવર્સિટી ઓફ મિશિગનમાંથી મિકેનિકલ એન્જિનિયરિંગ તથા ઇલેક્ટ્રિકલ અને કમ્પ્યુટર એન્જિનિયરિંગમાં ડ્યુઅલ માસ્ટર્સ ડિગ્રી પ્રાપ્ત કરી છે. તેઓએ ભારતના તમિલનાડુ સ્થિત પીએસજી કોલેજ ઓફ ટેકનોલોજીમાંથી ઇન્સ્ટ્રુમેન્ટેશન એન્ડ કંટ્રોલ સિસ્ટમ્સમાં બેચલર ડિગ્રી મેળવી છે.
ગુજરાતીમાં અન્ય સમાચારો વાંચવા અહીં ક્લિક કરો "ન્યુ ઇન્ડિયા અબ્રોડ ગુજરાતી"
Related
.jpg)
ADVERTISEMENT
ADVERTISEMENT
E Paper
Video
Comments
Start the conversation
Become a member of New India Abroad to start commenting.
Sign Up Now
Already have an account? Login